[:gl]Novas[:es]Noticias[:en]News[:]

O Clúster participou na entrega de distincións SICTED do GDR Condado Paradanta e na gala de Feprohos, Asehospo e Avipo.

Suma e segue de recoñecementos para o sector turístico da provincia pontevedresa. Se o pasado venres 10 era a Deputación de Pontevedra a que celebraba unha nova edición da Gala Provincial do Turismo, o luns 13 e o martes 14 eran o GDR Condado Paradanta e a Federación Provincial de Empresarios de Hostalería (Feprohos), a Asociación de Empresarios de Hospedaxe de Pontevedra (Asehospo) e a Asociación de Axencias de Viaxes de Pontevedra (Avipo), respectivamente, quen se vestían de festa para homenaxear ao sector. E facíano en ambos os casos coa participación activa do Clúster Turismo de Galicia.

Un total de 29 empresas radicadas no xeodestino Condado Paradanta recibiron o seu selo de calidade SICTED durante o acto celebrado o luns 13 no Balneario de Mondariz coa participación da directora da Axencia Turismo de Galicia, Nava Castro; o presidente do Clúster, Cesáreo Pardal, e os alcaldes e alcaldesa dos dez municipios do devandito xeodestino: Arbo, A Cañiza, As Neves, Crecente, Covelo, Mondariz, Mondariz Balneario, Ponteareas, Salceda de Caselas e Salvaterra de Miño. Cesáreo Pardal aproveitou a súa intervención no acto para destacar o labor das empresas do sector e animalas a seguir traballando pola excelencia turística.

Un día despois, o martes 14, o Hotel Áttica 21, de Vigo, acolleu a cea de gala de entrega de premios de turismo e hostalería da provincia de Pontevedra organizada por Feprohos, Asehospo e Avipo coa presenza tamén da directora de Turismo de Galicia e o presidente do Clúster, e neste caso ademais, do presidente da Xunta, Alfonso Rueda. O titular do Goberno galego foi, precisamente, o encargado de recoller o premio concedido ao Xacobeo pola súa promoción do Camiño Portugués, galardón que lle foi entregado por Cesáreo Sánchez-Ballesteros, presidente de Feprohos e Asehospo, ademais de secretario do Clúster Turismo de Galicia.

Cesáreo Pardal participou tamén na entrega de premios e deu o parabén a todos os profesionais e empresas da provincia polo seu esforzo e bo facer. Ademais, avogou por “seguir avanzando na dixitalización, a sustentabilidade, a desestacionalización e a internacionalización”, destacou a importancia da colaboración coa Administración pública e reafirmou o compromiso do sector co territorio e as comunidades locais, así como a súa capacidade tractora de doutras actividades.