Clúster

• Os tres aeroportos mobilizaron ata o mes de xullo un 24% máis de pasaxeiros

As terminais galegas melloraron notablemente as cifras de visitantes con respecto ao mesmo período no ano anterior. Os aeroportos galegos mobilizaron a un total de 3.365.983 viaxeiros (655.573 máis), o que corresponde a un 24% máis que os que pasaron polas súas instalacións durante os sete primeiros meses de 2022.

Por aeroportos, o máis empregado foi o de Santiago-Rosalía de Castro, que recibiu a 2.005.518 pasaxeiros, un 14,9% máis que no 2022 e un 21,4% máis que no último ano prepandemia, 2019.

O da Coruña foi o segundo con maior número de visitantes, acumulando 716.894 pasaxeiros, un 48% máis que o ano anterior; mentres que por Peinador pasaron 643.571 persoas, un 33,8% máis.

De acordo ao último balance publicado por Aena, o de Rosalía de Castro mantense como o aeroporto que máis medra en España, entre os que moven máis de 2 millóns de pasaxeiros anuais.

Tan só no mes de xullo chegaron en avión a Galicia 626.983 pasaxeiros, preto de 70.000 por enriba dos rexistrados no sétimo mes do ano anterior, un 12,4% máis.

As cifras a nivel estatal tamén melloraron: a rede de Aena rexistrou 159,2 millóns de viaxeiros, o que supón un aumento do 20,6% con respecto ás cifras de 2022, e dun 1,2% ao 2019. Neste mesmo período rexistráronse 1.372.980 movementos de aeronaves, un 9,5% máis con respecto a 2022, e transportáronse 594.323 toneladas de mercancía, un 3,6% máis.