Clúster

• Inscrición aberta ata o 10 de outubro

O Clúster Turismo de Galicia lembra aos seus asociados que continúa aberto o prazo de inscrición para participar no workshop profesional de Fairway Santiago 2025, que se celebrará os próximos 10 e 11 de novembro na Cidade da Cultura de Galicia.

• As empresas asociadas ao Clúster poderanse beneficiar dunha cota de participación bonificada polo seu vínculo institucional

O encontro, especializado no Camiño de Santiago, reunirá a empresas turísticas galegas e nacionais con compradores internacionais de primeiro nivel. As compañías asociadas ao Clúster poderán acceder a condicións preferentes, cunha cota bonificada de 230 euros máis IVE (278,30 euros en total).

• As inscricións están abertas ata o 10 de outubro con prazas limitadas

O prazo de inscrición finaliza o 10 de outubro, con prazas limitadas e un máximo de dous representantes por empresa. Para aplicar o desconto será imprescindible indicar “Clúster de Turismo de Galicia” ao seleccionar a modalidade de pago “Cota Inscrición Bonificada por vinculación a Institución/Asociación”.

Tras o peche de inscricións, as entidades participantes recibirán acceso á plataforma dixital de Fairway, onde poderán consultar os perfís de Hosted Buyers rexistrados e marcar as súas preferencias de reunións. Días antes do evento faráselles chegar unha axenda personalizada de citas, axustada aos seus intereses comerciais.

Fairway Santiago 2025 consolídase coma unha das principais oportunidades para a promoción e comercialización de produtos e servizos vinculados ao Camiño, ofrecendo un espazo de networking profesional con proxección internacional.