Clúster

• O turismo internacional acadou un máximo histórico nos seis primeiros meses do ano, chegando ao 30% de visitantes.
• A Comunidade superou nun 12% o número de viaxeiros aloxados, en nun 9% o número de noites.

Galicia rexistrou un forte incremento no que a turismo internacional se refire, obtendo o máximo da serie histórica nos primeiros seis meses deste 2023. Segundo os datos de ocupación do Instituto Nacional de Estadística (INE), durante este período a Comunidade rexistrou 2.040.435 viaxeiros aloxados e 3,6 millóns de noites no conxunto dos establecementos de aloxamento (hoteis, pensións, apartamentos turísticos, cámpings, turismo rural e albergues). Ditas cifras superan os datos do ano pasado cun 12% e 9% respectivamente.

Estudando os datos, a maior parte do turismo continúa sendo de ámbito nacional: os españois que proceden doutras comunidades autónomas representan o 44% do total, mentres que os residentes galegos constitúen o 26%.

O turismo internacional presenta un forte incremento, acadando en 2023 un máximo da serie histórica dos primeiros seis meses do ano: o 30% da demanda foi internacional, chegando ás 1,1 millóns de noites nos establecementos de aloxamento.

No seu estudo sobre o mercado turístico hoteleiro, o INE tamén achegou datos por provincias. Neste caso o 47% das noites hoteleiras rexistrounas A Coruña, seguida por Pontevedra co 31%; Lugo co 13% e Ourense co 8% do total. O litoral atlántico mantense como foco de interese turístico, acumulando o 79% das noites entre A Coruña e Pontevedra.