Clúster

• O programa busca impulsar proxectos de redes de actores que desenvolvan experiencias turísticas sostibles, dixitais, integradoras e competitivas.
• O prazo de solicitudes está aberto ata o 20 de setembro.

O pasado mércores, 2 de agosto, publicábase no Boletín Oficial do Estado a convocatoria do programa Experiencias Turismo España, impulsado polo Ministerio de Industria, Comercio e Turismo. A liña de axudas conta con 20 millóns de euros procedentes do Plan de Recuperación, Transformación e Resiliencia.

Este programa ten por obxecto impulsar proxectos de redes de actores que desenvolvan experiencias turísticas sostibles, dixitais, integradoras e competitivas en España, que se repliquen no ámbito nacional ou no territorio de, polo menos, tres comunidades autónomas.

O seu obxectivo é desenvolver novos produtos turísticos, mellorar as capacidades dos destinos, atraer a turistas a novos destinos rurais ou de interior, mellorar a sustentabilidade das experiencias turísticas, impulsar a transición dixital e mellorar a capacidade de resiliencia.

O importe dos proxectos financiados oscilará entre 100.000 e 1.000.000 de euros. O pago da subvención realizarase con carácter anticipado polo importe de ata o 100% daquela parte do orzamento do proxecto que fose considerado financiable. O prazo de presentación de solicitudes finalizará o vindeiro 20 de setembro ás 14:00 horas. As solicitudes deben presentarse a través da sede electrónica do Ministerio.

Na anterior convocatoria foron 15 as entidades públicas e empresas galegas que se beneficiaron do programa recibindo 1,77 millóns de euros. No marco deste programa, Galicia desenvolve experiencias turísticas innovadoras e sostibles relacionadas co surf, enoturismo, turismo mariñeiro e termal, o litoral, o ceo, ou relacionadas co Camiño de Santiago.