Clúster

• Poñerase en marcha o Observatorio de Sustentabilidade Turística, intensificarase o persoal e apostarase pola formación e dixitalización.

O director de Turismo de Galicia, Xosé Merelles, presentou no Parlamento a semana pasada as liñas de actuación e o orzamento de 2025 para o seu departamento, que ascende a máis de 146 millóns de euros. A Xunta destinará estes fondos á modernización do sector, dixitalización e sostibilidade. As iniciativas pretenden reforzar a planificación do turismo, mellorar a distribución de visitantes no territorio e promover unha actividade económica sostible.

Entre as medidas destacadas, poñerase en marcha o Observatorio de Sostibilidade Turística, que permitirá monitorizar o destino e anticipar tendencias. Ademais, instalaranse novos sensores no Camiño de Santiago e implementaranse sistemas de regulación de fluxos para xestionar a afluencia de turistas e asegurar unha experiencia óptima tanto para visitantes como para residentes. O plan tamén inclúe reforzar a actividade inspectora en todos os tipos de actividade turística.

En canto á dixitalización, máis de 2,5 millóns de euros destinaranse á formación e competencias dixitais para profesionais do sector no Centro Superior de Hostalaría de Galicia. Promoverase a internacionalización do destino, con iniciativas de promoción en mercados estratéxicos como EE. UU., Xapón, México e Brasil, ademais da participación na Expo 2025 de Osaka.

A Xunta tamén ampliará a capacidade aloxativa e apoiará a infraestrutura turística de municipios pequenos, con axudas de 2 millóns de euros. Para mellorar a experiencia no roteiro xacobeo, implementaranse carreiros seguros para peregrinos en tramos concorridos, crearanse albergues e impulsaranse proxectos enfocados na accesibilidade e benestar no Camiño. O orzamento de 2025 reforza así o compromiso da Xunta cun modelo turístico sostible e de calidade, adaptado aos retos da Estratexia Turismo de Galicia 2030.