Clúster

Do 2 ao 4 de setembro o municipio ourensán da Veiga celebrará a terceira edición das xornadas Astrotrevinca, co obxectivo de achegar a astronomía a todo tipo de públicos. A Veiga, Destino StarLight de Galicia xunto coas Illas Cíes, é un dos mellores puntos para realizar observacións deste tipo polo que, nesta ocasión, o programa das xornadas incluirá tanto conferencias con expertos para debater sobre a observación das estrelas e as últimas novidades nesta materia, como talleres e xornadas de observación nocturna abertas para o público en xeral.

Tanto o director das xornadas, Óscar Branco, como o vicepresidente da Deputación de Ourense, Rosendo Fernández, destacaron as excelentes condicións que ofrece este punto da xeografía ourensá e as grandes posibilidades que ofrece para o impulso do astroturismo. O alcalde da Veiga, Juan Anta, apuntou pola súa banda que o astroturismo ?está a funcionar ben e, de feito, antes de comezar a anunciar estas xornadas xa temos moitas das nosas casas rurais reservadas para eses días?.

O prezo para participar nas xornadas é de 10 euros, 25 con comida e poden inscribirse na Oficina de Turismo da Veiga, a través do número de teléfono 988350130 ou do correo turismo.aveiga@gmail.com.