Clúster

Turismo de Galicia repartirá un total de 500.000 euros para a dixitalización, mellora das instalacións e aumento da eficiencia enerxética dos establecementos beneficiarios.

Este luns, 8 de agosto, finaliza o prazo para solicitar as axudas convocadas pola Xunta de Galicia a través de Turismo de Galicia para acometer investimentos destinados a modernizar, dixitalizar e mellorar a eficiencia enerxética dos albergues turísticos privados. A convocatoria está dotada cun orzamento total de 500.000 euros e cada beneficiario poderá recibir unha subvención do 80 % do investimento previsto ata un máximo de 6.000 euros.

Entre os gastos que poderán sufragarse a través deste programa de axudas figuran a instalación de sistemas domóticos e de eficiencia enerxética, como recuperadores de calor, sistemas de arrefriado gratuíto, paneis solares para autoconsumo, puntos de recarga para vehículos eléctricos, renovación de equipos por outros de menor consumo,  ademais de melloras de illamentos térmicos e sonoros, renovación de rótulos, e adquisición e posta en funcionamento de sistemas de control presencial, cartelería electrónica e notificacións a través de telefonía móbil.

Microempresas e pemes son os destinatarios desta convocatoria da que están excluídas os albergues de peregrinos de titularidade pública, os establecementos que forman parte da rede de albergues xuvenís e aqueles negocios dedicados ao aloxamento en salas colectivas por motivos escolares, educativos ou sociais. Ademais, os aspirantes deben estar rexistrados no Rexistro de Empresas e Actividades Turísticas da Xunta.