Clúster

Desde Portugal e por estrada, perfil maioritario do visitante chegado desde outros países á comunidade.

A chegada de visitantes estranxeiros a Galicia experimentou un forte incremento no primeiro semestre do ano. Así o destacan a responsables da Área de Estudos e Investigación de Turismo de Galicia na súa análise dos datos do Instituto Nacional de Estatística cifrando ese incremento en máis do 186 % con respecto ao mesmo período do 2021. Entre xaneiro e xuño deste ano Galicia recibiu a algo máis de medio millón de visitantes estranxeiros, o que supón o 1,7 % do total de turismo foráneo chegado a España.

Os datos mostran tamén como Portugal segue sendo o principal mercado emisor de visitantes estranxeiros en Galicia, posto que o 55 % dos turistas chegados á comunidade desde outros países durante o primeiro semestre dese ano procedían de alí (máis de 278.000 persoas). Estados Unidos, co 7,8 %, e Francia, co 5,8 %, completan o podio, con 39.000 e os 29.000 visitantes procedentes deses países. Séguenlles, en cuarta posición, os máis de 27.000 turistas alemáns chegados a Galicia entre xaneiro e xuño deste ano.

A preponderancia dos visitantes lusos propicia tamén que a estrada sexa a principal vía de entrada en Galicia: o 68 % dos turistas estranxeiros chegaron así a Galicia fronte ao pouco máis de 30 % que utilizou o avión. O lecer e as vacacións foron, así mesmo, o motivo principal que trouxo a Galicia a case o 75 % deses visitantes, mentres que para o 16 % chegou por negocios.