Clúster

• Os profesionais de restauración e aloxamentos poden solicitar pases dixitais para asistir ao fórum, que se celebrará do 23 ao 25 de marzo en EXPOCoruña.

O Galicia Fórum Gastronómico celebra a súa décima edición en EXPOCoruña, consolidándose como o encontro de referencia no noroeste peninsular para a hostalería e a gastronomía. Durante o evento, os asistentes poderán gozar de relatorios, showcookings, talleres e demostracións a cargo dalgúns dos xefes de cociña máis influentes do panorama nacional e internacional. Figuras como Joan Roca, Elena Arzak, Ricard Camarena, Lucía Freitas ou Javier Olleros serán parte dun programa que combina innovación, tradición e sostibilidade.

Ademais da oferta expositiva con máis de 200 marcas, o Fórum contará con espazos dedicados á gastronomía líquida, como o Wine Circus, o Craft Beer Market ou o Coffee Forum, onde o café de especialidade será protagonista. Tamén se celebrarán concursos como o Premio Cociñeiro Galego 2025, o Campionato de Tiraje de Cervexa de Estrela Galicia e o Desafío XChef, que poñerán en valor o talento e a creatividade do sector.

Co obxectivo de achegar esta experiencia aos profesionais do sector, o Clúster Turismo de Galicia pon ao dispor pases dixitais gratuítos para profesionais de restauración e aloxamentos, permitindo o acceso á feira e ás súas actividades. Cada establecemento poderá solicitar ata catro acreditacións, facilitando así a asistencia de equipos de traballo interesados en coñecer de primeira man as últimas tendencias en gastronomía e enoturismo.

O Clúster Turismo de Galicia aposta por achegar aos profesionais as mellores oportunidades de formación e inspiración, reforzando o vínculo entre turismo e gastronomía como eixos fundamentais do desenvolvemento do sector. As solicitudes de pases dixitais estarán dispoñibles ata o venres, 21 de marzo, ás 13:00 horas, brindando aos negocios galegos a posibilidade de formar parte desta cita imprescindible.