Actividades

A capital irlandesa acollerá este xoves un workshop no que participarán case unha decena de empresas galegas.

O Clúster Turismo de Galicia está xa inmerso na estratexia de promoción internacional para este 2023. Irlanda converterase este xoves na primeira parada dunha campaña que xa ten varias datas no seu calendario, como é o caso da próxima ITB Berlín.

No caso da cita prevista para este xoves 9 de febreiro na capital irlandesa, trátase dun workshop que permitirá aos representantes de case unha decena de empresas galegas de receptivo manter reunións cunha trintena de operadores locais co obxectivo de dar a coñecer o Destino Galicia en xeral e as súas respectivas ofertas turísticas en particular.

As empresas Galiwonders, Rutas Meigas, Interrías, Pilgrim Travel, ArtNatura Galicia, Vioviajes e Always Spain Incoming integran a comitiva encabezada polo presidente do Clúster, Cesáreo Pardal, e o tesoureiro da entidade, Alfonso Martínez. Está previsto tamén que o director da Oficina de Turismo de España en Dublín, Rubén López Puído, asista ao encontro organizado en Dublín.

Ademais, o Clúster traballa xa na organización da misión comercial á ITB Berlín, a feira internacional que se celebrará en terras alemás do 7 ao 9 de marzo. Xa está aberto o prazo de inscrición para aquelas empresas galegas queiran participar na viaxe.