Actividades

Os cámpings Paisaxe II e Illa de Ons, e o hotel Bosque Mar, primeiros galardoados cos premios Turismo Sostible Provincia de Pontevedra.

O presidente do Clúster, Cesáreo Pardal, destacou na Gala do Turismo da Deputación pontevedresa o bo traballo do sector e a súa importancia económica e social.

O sector turístico da provincia de Pontevedra volveuse reunir o venres pasado para gozar dunha xornada de festa promovida pola Deputación e na que a sustentabilidade ocupou un papel central. A nova edición da Gala do Turismo da Deputación estreaba os Premios Turismo Sostible Provincia de Pontevedra e fíxoo cun recoñecemento ao sector, que constituíu tamén un recoñecemento para o Club de Produto Galicia Destino Sostible, creado por este Clúster para mediado do ano pasado e do que xa forman parte ao redor de 70 empresas de toda Galicia. Tres delas foron, precisamente, as galardoadas durante a gala celebrada no Auditorio Mar de Vigo o venres 10 cos novos premios da Deputación: o cámping Praia Paisaxe II, do Grove; que levou o primeiro galardón; o cámping Illa de Ons, situado na illa do municipio de Bueu, que recibiu o segundo, e e Hotel Bosque Mar, do Grove, que obtivo o terceiro premio.

“Os recoñecementos son un aval do bo facer e un revulsivo para seguir traballando con ilusións renovadas. Así que celebremos hoxe o camiño percorrido e sigamos mañá con novos alentos a ruta marcada para seguir sendo un sector tractor da economía galega, un sector que contribúe á mellora da súa contorna e á transmisión da nosa cultura e tradición”, destacou o presidente do Clúster, Cesáreo Pardal, na súa intervención na gala, que aproveitou tamén para agradecer o traballo e a colaboración da Deputación pontevedresa e felicitar tamén a todos os protagonistas da velada: “Por iso o meu parabén ás mulleres artesás da provincia nomeadas embaixadoras das Rías Baixas 2023 (Elena Ferro, Paula Ojea, Ana Tenorio, Marta Armada e Virginia Rodríguez); ás 165 empresas pontevedresas ás que se lles fará entrega do diploma SICTED; e aos establecementos que galardoados na primeira edición dos Premios Turismo Sostible Provincia de Pontevedra”.

“Se xa todos os anos esta Gala é un espectáculo, este ano queriamos dalo todo porque o sector turístico merece que lle fagamos un gran recoñecemento e agradecemento polo seu compromiso coa excelencia e con mellorar a atención, pero sen deixar de coidar o territorio e loitando pola sustentabilidade e contra a masificación do noso destino”, explicou pola súa banda a presidenta provincial, Carmela Silva, durante esta celebración que reuniu a medio milleiro de persoas no auditorio vigués e na que non faltou a música, a danza nin as propostas audiovisuais.