Actividades

O aniversario da entidade e o Club de Produto Galicia Destino Sostible serán os eixos das dúas presentacións que realizará na feira internacional turística que se celebrará do 18 ao 22 de xaneiro en Madrid.

O Clúster xestionará o espazo de negocios da caseta de Galicia, que foi presentado de forma oficial en Santiago de Compostela o venres 13.

O Clúster Turismo de Galicia acudirá un ano máis á Feira Internacional de Turismo, FITUR, que se celebrará en Madrid do 18 ao 22 de xaneiro, para dar voz e visibilidade ao sector turístico galego. De novo, será a entidade encargada de xestionar o espazo de negocios do stand da Xunta de Galicia e a Axencia Turismo de Galicia, e aproveitará ese stand para realizar dúas presentacións que nesta ocasión terán unha significación especial. Fai dez anos que botou a andar o Clúster, así que a conmemoración dese décimo aniversario será o eixo do acto previsto para o venres 20 (ás 13 horas) baixo o título “Clúster Turismo de Galicia: Dez anos sumando esforzos para impulsar un sector estratéxico”. Ademais, dous días antes, durante a xornada inaugural de FITUR, o mércores 18 (ás 11 horas), o Clúster realizará unha presentación do Club de Produto Galicia Destino Sostible, posto en marcha fai apenas seis meses coa colaboración da Xunta e do que xa forman parte 70 empresas.

Ao contido de ambas as presentacións e á importancia que supón esta edición de FITUR referiuse o presidente do Clúster, Cesáreo Pardal, este venres 13 durante o acto celebrado en Santiago de Compostela para realizar a presentación do stand da Xunta, e no que tamén tomaron parte a a directora da Axencia Turismo de Galicia, Nava Castro; a directora do Centro Superior de Hostalería de Galicia, Marta Fernández; a xerente de Galicia Calidade, Ana Méndez, a xefa do Departamento de Promoción da Axencia Galega da Calidade Alimentaria, María José González, e o presidente de Ourives de Compostela, Antonio Ouro.

“Como indica o lema desta nova edición de FITUR, ‘Coidamos do mundo. Somos turismo`. Sen sustentabilidade non haberá turismo e por iso é un elemento esencial da estratexia turística de Galicia”, explicou Cesáreo Pardal antes de detallar que “Galicia, Destino Sostible será protagonista das presentacións do Clúster, que ademais, cumpre este ano unha década representando ao sector, o que fai que esta edición de FITUR sexa aínda máis especial para nós e durante a que compartiremos, tamén, esta traxectoria de dez anos de historia así como as perspectivas de futuro”. O presidente do Clúster tamén agradeceu a colaboración da Xunta. “Un ano máis o Clúster Turismo de Galicia, da man da Administración autonómica, exerceremos de embaixadores da nosa terra, poñendo en valor a ampla variedade de experiencias e posibilidades que ofrece con máis de medio centenar de presentacións nesta 43 edición de FITUR. Será unha mostra da nosa riqueza natural, patrimonial e cultural que coidamos e protexemos para que siga constituíndo unha oferta sólida e atractiva”.

Pola súa banda, a directora de Turismo de Galicia, Nava Castro, explicou durante a presentación do stand de Galica realizada en Compostela que a enogastronomía será o eixo central dun espazo que este ano rexistrará un récord de presentacións. o stand ocupará unha superficie de máis de 1.000 metros cadrados no pavillón 9 do IFEMA e acollerá máis de medio centenar de presentacións de recursos, produtos e novidades por parte de concellos, deputacións, xeodestinos e outras entidades galegas. Ademais, en sintonía coa idea da sustentabilidade que promove o Clúster, o espazo foi deseñado seguindo “o modelo circular das 4 R, (Reducir, Reutilizar, Reciclar e Recuperar), que forman parte das novas oportunidades que nos ofrece o turismo en Galicia”.