Actividades

• No evento participaron Cesáreo Pardal, presidente do Clúster ; e Diego Otero, vogal do Consello Executivo e membro do Comité de Avaliación de Galicia Destino Sostible.

O pasado mércores, 26 de abril, a oficina Española de Turismo en Reino Unido celebrou en Londres o primeiro Día da Sustentabilidade en España. Na cita abordáronse os novos desafíos do turismo e as iniciativas sostibles que se implementaron no noso país ata o momento. O evento, ao que acudiron Cesáreo Pardal, presidente do Clúster de Turismo, e Diego Otero, vogal do Consello Executivo e membro do Comité de Avaliación de Galicia Destino Sostible, consistiu nunha conferencia sobre a sustentabilidade e a posterior entrega dos premios xornalísticos de turismo responsable.

Durante a conferencia, dirixida a operadores turísticos e medios especializados, debatéronse as estratexias de viaxes sostibles desde diferentes ángulos: profundando no aspecto social da sustentabilidade e na problemática do turismo de masas nos puntos máis críticos, así como técnicas para evitar o ecoblanqueo (greenwashing).

Durante a súa participación no panel sobre o impacto turístico nas comunidades locais, Diego Otero falou sobre as formas en que o turismo pode apoiar a outros ámbitos (como o da pesca) de forma directa, impulsando así o beneficio para os diferentes sectores.

Na súa intervención, Otero presentou o Club de Produto “Galicia Destino Sostible”,  una iniciativa que nace co obxectivo de integrar e poñer valor a oferta turística da rexión que contribúe a un crecemento sostible do destino. Dito proxecto conta con máis de 70 empresas adheridas e preto de 170 ofertas turísticas publicadas na súa web. A través desta plataforma conecta a turistas e empresas, facilitando o acceso á extensa oferta turística sostible en Galicia.

Con esta participación no Spain’s Sunstainability Day promovemos a aposta do Clúster por un turismo sostible, co Club de Produto “Galicia Destino Sostible” como aval de sustentabilidade e calidade.