Actividades

• Troulanda, Malates Slow Boutique Hotel, Adegas Terras de Asorei, Náutica Medusa e Acastrexa son as últimas incorporacións da marca turística.
• O Club de Produto GDS suma máis de 135 empresas adheridas e 155 experiencias sostibles, e mantense aberto a novas incorporacións.

O Club de Produto “Galicia Destino Sostible” segue a medrar coa incorporación de cinco novas empresas comprometidas co turismo responsable en Galicia. Na última reunión do comité de avaliación, celebrada o pasado 27 de marzo, aprobáronse as adhesións de Troulanda, Malates Slow Boutique Hotel, Adegas Terras de Asorei, Náutica Medusa e Acastrexa, reforzando así a aposta por un modelo turístico máis sostible.

Con estas incorporacións, o club supera xa as 135 empresas adheridas e ofrece máis de 155 experiencias centradas na sostibilidade, abarcando aloxamentos, adegas, actividades náuticas e turismo en contacto coa natureza.

Desde a súa creación en 2022 polo Clúster Turismo de Galicia, co respaldo da Xunta de Galicia, “Galicia Destino Sostible” traballa para posicionar a comunidade como un destino de referencia en turismo sostible. O club promove prácticas que respectan o medio ambiente, a cultura e a sociedade, impulsando ao mesmo tempo o desenvolvemento económico do territorio.

Como formar parte de “Galicia Destino Sostible”?

As empresas interesadas poden solicitar a súa adhesión a través da web galiciadestinosostible.com. Para formar parte, é necesario cumprir con polo menos un requisito habilitante (como certificacións de sustentabilidade ou pertenza a iniciativas de ecoturismo) ou o 100% dos requisitos obrigatorios e un 33% dos valorables.

Unha vez aceptada, a empresa poderá xestionar as súas ofertas desde o portal e acceder ás vantaxes do club de produto de forma gratuíta.