[:gl]Novas[:es]Noticias[:en]News[:]

• En 2023 recibíronse máis de medio millón de visitas.
• Este dato supón un incremento do 5% con respecto a 2022.

A Xunta oficiou os datos das visitas ao Parque Nacional marítimo-terrestre das Illas Atlánticas en 2023. Rexistráronse case 515.000 visitantes, incrementándose en todos os arquipélagos, especialmente nas Cíes, con máis de 343.000 visitas, dous terzos do total.

Este incremento de cifras, segundo a Xunta, débese “ao bo facer das empresas e dos responsables do parque, que o consolidaron como un destino natural de referencia para aqueles que buscan conectar coa natureza”.

Tamén se destacou que o Parque Nacional no seu conxunto ofrece unha experiencia única nun espazo privilexiado no mundo, sinónimo de calidade e respecto polo medio ambiente.

Un total de 26 empresas que traballan neste espazo renovaron (13) ou recibiron (13) a súa adhesión á Carta Europea de Turismo Sostible, polo que apostan pola promoción dun turismo de calidade, sostible e responsable. Estas acreditacións son entregadas por Europarc, e están destinadas a espazos naturais protexidos e comprometidos co turismo sostible.

Entre as empresas socias destacan algunhas de turismo náutico, de acampada e de turismo guiado, que se converten en embaixadores do turismo sostible, xa que satisfán as necesidades de visitantes, empresas e poboacións sen prexudicar ao medio ambiente.