[:gl]Novas[:es]Noticias[:en]News[:]

O stand de Galicia acolleu 30 presentacións de vilas e recursos turísticos, ademais de recibir a visita da ministra Ana Pastor, a secretaria do Estado de Turismo, Isabel Borrego, o presidente da Xunta, Alberto Núñez Feijoo ou o vicepresidente, Alfonso Rueda, además de alcaldes e outras moitas autoridades autonómicas e locais.

A directora de Turismo de Galicia, Nava Castro, destacou durante a súa estadía en Fitur que “Galicia ten moito que ofrecer”. Nesta liña, falou do seu patrimonio cultural destacando o Camiño de Santiago, do que dixo é “protagonista indiscutible da oferta galega”, a Torre de Hércules, a Muralla de Lugo e a cidade de Santiago, todos declarados Patrimonio da Humanidade pola UNESCO.

Así mesmo resaltou o patrimonio natural galego con máis do 12% do territorio protexido entre o que destacou o Parque Nacional das Illas Atlánticas. Nava Castro falou tamén do termalismo como “unha vantaxe diferencial e competitiva do destino Galicia”, ao contar con máis de 300 captacións de augas termais e 21 balnearios.  A directora de Turismo de Galicia resaltou os incribles datos rexistrados pola comunidade no pasado ano. “No 2014 batemos récords de peregrinos, con máis de 237 mil, de viaxeiros, con máis de 4 millóns, e de turistas internacionais, superando o millón”, afirmou.

Nava Castro incidiu na importancia da colaboración público-privada da cal dixo “está sendo un factor decisivo para a política turística de Galicia”. “A nosa aposta polo traballo conxunto está posicionando a nosa comunidade nun lugar destacado do turismo mundial”, afirmou.

Durante a celebración da feira sucedéronse as presentacións no stand de Galicia nas que non faltaron as intervencións da directora da Axencia de Turismo de Galicia, como fixo na presentación de Baiona ou da festa do Corpus Christi de Ponteareas, na presentación dos Parques Naturais ou dos Trens Turísticos galegos. Deste xeito recursos de Galicia tan importantes no reclamo dos turistas como o Camiño Inglés, o Ano Picasso, a Festa do Pulpo do Carballiño, Termatalia ou o Festival de Ortigueira foron presentados no primeiro día. Así mesmo, os visitantes ao expositor de Galicia puideron coñecer máis a fondo os destinos Ferrol, Arteixo, Arousa Norte e a mariña lucense así como descubrir a recoñecida gastronomía de Lugo coa presentación da nova guía “…E para comer Lugo”.

O stand de Galicia contou, ademais, coa presenza da ministra de Fomento, Ana Pastor, o presidente da Xunta, Alberto Núñez Feijoo na primeira xornada mentres que na segunda pasaron polo stand a secretaria do Estado para o Turismo, Isabel Borrego ou o vicepresidente da Xunta, Alfonso Rueda, ademais doutras autoridades autonómicas e locais galegas durante as diferentes presentacións que se foron sucedendo.