destacados

As dúas iniciativas suman un investimento de máis de 85 millóns de euros destinada a consolidar o sector durante este Ano Santo, segundo explicou o vicepresidente da Xunta aos representantes do sector en Fisterra

Representantes do sector turístico da Costa da Morte e do Clúster Turismo de Galicia mantiveron esta semana en Fisterra un encontro co vicepresidente primeiro da Xunta de Galicia e conselleiro de Presidencia, Xustiza e Turismo, Alfonso Rueda, para analizar a actualidade do sector e coñecer os plans do Goberno autonómico para o exercicio 2022.

A reunión, promovida polo Banco Sabadell baixo a denominación de Foro Finisterrae Encontros no Horizonte, tivo como relator principal a Rueda, que aproveitou a súa intervención para destacar os datos obtidos polo turismo galego durante o 2021 e que situaron a comunidade á cabeza da recuperación do sector no ámbito estatal, superando en case 25 puntos a media nacional.

Con respecto aos plans para o 2022, o vicepresidente da Xunta sinalou que os fondos europeos constitúen unha gran oportunidade para apontoar a recuperación e aproveitar o potencial engadido da continuación do Ano Santo 2021-2022. Así explicou que o Plan Xacobeo Next Generation supoñerá un investimento de 39,2 millóns de euros, dos que 22,7 serán destinados á posta en valor de 12 monumentos catalogados como Bens de Interese Cultural (BIC), 8,3 a accións de cohesión en destino, e 8,1 millóns a plans de sustentabilidade turística en destino.

Ademais, os 46,6 millóns de euros do Plan Camiña inclúen unha partida específica para as empresas do sector por importe de 21,6 millóns, que poderán ser empregados para a mellora dos establecementos turísticos, o incremento da calidade, a aceleración de iniciativas turísticas e a formación e profesionalización do persoal. Outros 3,3 millóns estarán destinados a iniciativas encadradas no turismo de familia, estratexias postas en marcha polas universidades galegas e entidades sen ánimo de lucro, mentres que os 21,7 millóns restantes serán xestionados por entidades locais.

No encontro celebrado en Fisterra tamén tomaron a palabra o presidente do Clúster, Cesáreo Pardal, e Jesús Picallo, vicepresidente da entidade ademais de presidente da Asociación de Empresarios do Camiño de Santiago a Fisterra e Muxía, Camiño Solpor.