destacados

Os responsables da Federación Galega de Turismo Rural presentaron en Fitur a súa nova campaña promocional.

A Federación Galega de Turismo Rural, Fegatur, presentou no stand de Galicia en FITUR o anuncio publicitario “Galicia turismo rural: A sinfonía dos abrazos”, destinado a promover e destacar que a proposta destes establecementos en Galicia é diversa, segura, saudable, sostible, diferenciadora e de calidade. Vista, oído, olfacto, gusto e tacto, pero tamén sentidiño e sentido do humor, son os sete sentidos que se activan nos establecementos adscritos a Fegatur e aos que se pode acceder desde a súa web, tal como destacou o presidente da entidade, Francisco Almuíña Chorén, durante unha posta en escena orixinal e inédita, e na que foi debullando os vínculos que as casas e os camiños teñen na vida das persoas e no seu diario peregrinar vital.

“O turismo rural de Galicia ofrece espazos nos que é fácil revitalizarnos e osixenarnos, paseando polos innumerables lugares e carreiros da nosa terra, porque merecemos un respiro. Porque os abrazos son un antídoto eficaz fronte á intoxicación do estrés, a tristeza e a desesperanza”, explicou Almuíña aos presentes no acto celebrado na feira turística madrileña. O presidente de Fegatur aproveitou ademais a presenza da directora da Axencia Turismo de Galicia, Nava Castro, para pedir que se manteña a aposta por iniciativas promocionais de “probada eficacia” como os bonos turísticos, o programa Galicia natural para persoas maiores de 55 anos e o Outono Gastronómico. “Deben seguir contando co merecido alento e apoio das administracións, institucións e empresas. Iso permitiranos seguir contribuíndo a un desenvolvemento sostible e preñado de futuro para todas as persoas que vivimos no rural.”

Ademais de Nava Castro, ao acto de Fegatur acudiron tamén o presidente do Clúster Turismo de Galicia, Cesáreo Pardal, e o vicepresidente da entidade, Jesús Picallo, así como o presidente da Asociación Galega de Axencias de Viaxes, Juan Rivadulla e o presidente de Hostalería de Galicia, Cheché Real.