Galicia foi a comunidade con máis novos establecementos certificados no 2020.
A aposta pola calidade do sector turístico galego volveu ter recoñecemento oficial. 38 novos establecementos recibiron durante o 2020 a certificación Q de Calidade Turística, o que converteu a Galicia na comunidade cun maior incremento de distincións no ámbito nacional e permitiulle reforzar a súa segunda posición no ranking total, sendo só superada por Andalucía.
Así o destacou o vicepresidente primeiro da Xunta e conselleiro de Xustiza, Presidencia e Turismo, Alfonso Rueda, durante o acto de recoñecemento celebrado hoxe no Museo do Mar de Galicia, en Vigo, coa participación da directora de Axénciaa Turismo de Galicia, Nava Castro, os responsables dos locais distinguidos, e outros representantes do sector, como o presidente do Clúster Turismo de Galicia, Cesáreo Pardal.
Galicia lidera a consecución de Q de Calidade en sete das distintas categorías tradicionais do sector (hoteis, axencias de viaxe, aloxamentos rurais, balnearios, portos deportivos, negocios de turismo activo e industrial) e sitúase na segunda posición en canto aos servizos de restauración. Ademais, a comunidade sobresaíu tamén nas novas tipoloxías incorporadas a este sistema de certificación: os aloxamentos sostibles e, especialmente, os espazos públicos singulares e os albergues, copando nestes dous últimos casos os 12 recoñecementos rexistrados en toda España no 2020.
Convenio co Clúster
Os establecementos certificados dispoñen de liñas de axudas específicas para adaptarse aos requisitos das Q de Calidade e afrontar o custo do proceso de certificación. Desde a Xunta precisan que ata o ano pasado a Administración autonómica destinou ao proceso de adhesión, certificación e renovación 426.000 euros e que a convocatoria do presente exercicio está dotada con 410.000 euros, dos que 260.000 van dirixidos a entidades locais e sectores turísticos, e os 150.000 restantes, ao convenio plurianual co Clúster Turismo de Galicia.