destacados

• O presidente do Clúster Turismo presentou esta mañá en FITUR os resultados do diagnóstico ao sector, que servirá para deseñar a Estratexia Turística de Galicia 2024-2030.
• Cesáreo Pardal amosou a súa satisfacción pola “rápida resposta do sector” neste “proceso de reflexión colectiva”, no que participaron máis de 1.000 axentes.
• A maioría das empresas aposta por reducir a estacionalidade con eventos fóra de temporada e diversificando produtos.

• O sector pon o foco nos mercados americano e canadense na súa aposta pola internacionalización fóra do ámbito europeo.

O sector turístico galego considera que entre os obxectivos da futura Estratexia Turística de Galicia 2024-2030 deben estar a sostibilidade, o incremento da  rendibilidade e un turismo menos estacional. Son parte das conclusións do proceso de escoita ao sector, no que participaron máis de 1.000 axentes públicos e privados e que permitiu elaborar un diagnóstico sobre a situación e os retos do turismo en Galicia.

O diagnóstico servirá como punto de partida para elaborar a futura Estratexia Turística de Galicia 2024-2030 que porá en marcha a Xunta en colaboración co sector. Os resultados desta consulta ao sector foron presentados esta mañá en Fitur 2024 polo presidente do Clúster Turismo de Galicia, Cesáreo Pardal, durante o evento Galicia é auga. Galicia é futuro, que foi clausurado polo presidente da Xunta, Alfonso Rueda.

Cesáreo Pardal destacou a “rápida resposta do sector nun espazo tan corto de tempo” e cualificou o proceso de “reflexión colectiva” cunha ampla participación de profesionais e entidades públicas e privadas.

O presidente do Clúster puxo en valor a importancia que o sector da á sostibilidade e o coidado dos nosos recursos como un dos obxectivos da futura estratexia turística de Galicia, así como  incremento da rendibilidade e a redución da estacionalidade.

Cesáreo Pardal abordou, tamén, outro dos grandes retos do sector, a profesionalización e a captación de talento. E neste sentido,  sinalou que é preciso facer un esforzo para as actividades vinculadas ao turismo sexan percibidas como atractivas e con posibilidades de desenvolvemento profesional. O presidente do Clúster sinalou que o turismo é unha industria que “xera emprego, que sabemos como facela sustentable apoiándonos nos nosos valores propios, na autenticidade, aproveitando ademais a súa capacidade para o reequilibrio territorial”.

O presidente do Clúster recordou que Galicia se identifica como un destino de calidade, e que isto é “un logro conxunto das empresas e das administracións”, ás que quixo agradecer as facilidades para o acceso ás diferentes certificacións que poñen en valor os produtos turísticos galegos.

Co horizonte de dous anos Xacobeos en 2027 e en 2032, o máximo responsable do Clúster de Turismo quixo referirse tamén a “nosa verdadeira gran marca turística” e á necesidade de estar preparados para estes fitos evitando concentracións que desvirtuarían o seu atractivo.

Diagnóstico ao sector

Respecto ás principais conclusións da consulta, destaca o peso que a sostibilidade ten para o sector, un elemento que se destacou de modo recorrente, tanto nas 20 mesas de traballo celebradas como nas preto de 600 enquisas online recibidas. A metade consultados coincidiron en que Galicia conta con potencial para consolidarse como un destino sostible e que sería preciso incidir na visiblización os produtos sostible, na formación e capacitación deste aspecto entre os profesionais do sector e en fórmulas de financiamento e axudas para a adaptación en materia de sostibilidade.

Respecto á rendibilidade das empresas, un 10% sitúa a rendibilidade nun nivel moi alto. Para o sector os factores que máis inflúen na rendibilidade son os custos das operacións, o prezo e a dimensión e tamaño das empresas.

A redución da estacionalidade é outra das cuestións prioritarias para o turismo galego. Un obxectivo  para a que apuntan actuacións como a convocatoria de eventos de interese fóra de tempada alta; a promoción de produtos menos estacionais; ou a aposta por unha maior diversificación turística.