destacados

En virtude dun convenio asinado entre as Asociacións das Rutas do Viño de Galicia e a Xunta de Galicia, a administración pública dotará a oferta enoturística galega dunha ferramenta tecnolóxica que permita aos viaxeiros realizar reservas en liña deste tipo de actividades.

A plataforma de comercialización de experiencias enogastronómicas comezará a dar os seus primeiros pasos a finais deste ano aínda que non estará plenamente operativa até 2020. O obxectivo final é que os turistas poidan comprar paquetes enoturísticos coa mesma facilidade e inmediatez que hoxe en día se pode reservar a través da internet un voo ou un hotel, impulsado así este segmento turístico e dotándoo de ferramentas que melloren a súa competitividade e modernización.

Nunha primeira fase a web permitirá que os viaxeiros e os propios galegos teñan ao seu alcance, nun único sitio web, toda a información e oferta enogastronómica dispoñible no territorio que abarca a denominación de orixe, así como os servizos complementarios. Posteriormente, nunha segunda fase, prevista para 2020, os establecementos asociados ao enoturismo como adegas, restaurantes, aloxamentos, museos, guías, transportes e a propia Asociación da Ruta dos Viños poderán xestionar directamente e sen intermediarios os produtos que pon á venda, informar da súa dispoñibilidade ou crear ofertas especiais. Ademais, porase en marcha unha aplicación para as empresas do sector que permitirá rexistrar as entradas dos visitantes cando ingresen ás súas instalacións evitando a falsificación de tíckets e establecendo un control.

Coa posta en marcha desta iniciativa, o enoturismo galego avanzará en calidade facendo uso da tecnoloxía smart aplicada ao sector turístico. A posta en marcha desta nova plataforma contribuirá, ademais de beneficiar ás empresas dun centenar de concellos do catro provincias, a seguir impulsando o enoturismo en Galicia, un sector en que a Xunta está a traballar de maneira transversal.

Estas iniciativas complétanse con outras iniciativas como a estratexia Galicia Sabe, a folla de ruta transversal en que se recollen as principais liñas de actuación e as prioridades para promover un turismo enogastronómico sustentable baseado nos produtos autóctonos e de tempada, ou no apoio da Xunta para a sinalización turística das Rutas dos Viños ou da celebración das xornadas de portas abertas, entre outras actividades.