destacados

• O presidente e vicepresidente do Clúster, Cesáreo Pardal e Jesús Picallo, reuníronse co conselleiro de Emprego, Comercio e Emigración, José González, e o director de Turismo de Galicia.

O Clúster de Turismo de Galicia reuniuse co conselleiro de Emprego, Comercio e Emigración, José González, e co director de Turismo de Galicia, Xosé Merelles, nun encontro de traballo orientado a reforzar as sinerxías entre a Administración autonómica e o sector turístico galego en materia de xeración de emprego, captación de talento e valorización das profesións turísticas.

Durante a reunión, na que participaron o presidente do Clúster, Cesáreo Pardal, o vicepresidente, Jesús Picallo, xunto con varios integrantes da secretaría técnica, trasladouse á Xunta unha selección das medidas prioritarias da Estratexia do Turismo de Galicia 2030, centradas na mellora da empregabilidade e na dinamización económica do territorio a través do turismo. O Clúster destacou a necesidade de actuar de maneira coordinada para responder aos retos laborais actuais, apostando pola innovación, a formación e o relevo xeracional no sector.

Entre as propostas seleccionadas, o Clúster destacou os programas de apoio a produtos turísticos innovadores, que promovan a colaboración entre o turismo e outros sectores estratéxicos como o comercio e a industria.  Tamén se abordou a necesidade de desenvolver accións dirixidas á valorización das profesións turísticas, co obxectivo de mellorar a percepción social do sector e fomentar as vocacións entre a mocidade.

Outro dos puntos destacados foi a importancia de impulsar mecanismos que faciliten o relevo xeracional, a recuperación do talento emigrado e a contratación de persoas desempregadas, a través de programas conxuntos que combinen formación, incentivos e acompañamento. O Clúster defendeu a súa vontade de colaborar na configuración de iniciativas que respondan á realidade do emprego turístico en Galicia e contribúan a fixar poboación no territorio.

O Clúster de Turismo de Galicia agradeceu a receptividade da Xunta e manifestou o seu compromiso por seguir a traballar de maneira colaborativa coas distintas consellerías para consolidar un sector turístico máis forte, competitivo e sostible, capaz de xerar emprego de calidade e de contribuír ao desenvolvemento social e económico de Galicia.