A posta de longo da campaña “Galicia, camiño da sustentabilidade” é a primeira actividade prevista no stand da Xunta tras o acto inaugural “Xacobeo 21-22. Camiña a Galicia”.
O stand de Galicia en Fitur, a feira internacional de turismo cuxa 42 edición se celebra do 19 ao 23 de xaneiro nas instalacións de Ifema, acollerá medio centenar de presentacións destinadas a dar a coñecer a extensa e variada oferta turística galega. Administracións e organismos públicos de ámbito local, comarcal, provincial e autonómico, entidades do mundo asociativo, empresas e outros colectivos diversos dispoñerán de espazo e tempo no stand máis de 1.000 metros cadrados preparado pola Xunta para realizar durante as tres primeiras xornadas da feira (as reservadas aos profesionais do sector) a posta de longo das iniciativas coas que promocionan os seus destinos.
Alí estará de novo o Clúster Turismo de Galicia, que será ademais o encargado de abrir as actividades programadas no espazo de Galicia tras o acto inaugural que se desenvolverá o mércores ao mediodía baixo o título de “Xacobeo 21-22. Camiña a Galicia”. A continuación (13.30 horas) o Clúster presentará a campaña “Galicia, camiño da sustentabilidade” e os produtos deseñados para consolidar á comunidade como un destino seguro e sostible.
Tras este acto e durante tres días sucederanse as presentacións organizadas polos departamentos de turismo de municipios como A Coruña, Ferrol, Santiago de Compostela, Ourense, Pontevedra, Lugo, Salvaterra, Tui, Vilanova de Arousa, Pontecesures, Catoira, Valga e A Estrada; e organismos como a Consellería de Medio Ambiente, Territorio e Vivenda, a Vicepresidencia Primeira da Xunta, as deputacións de Ourense e A Coruña, o Inorde, Expourense, Portos de Galicia, o Consorcio de Turismo Ribeira Sacra e a Mancomunidade de Ordes.
Tamén reclamarán a atención das visitantes entidades como a Rede de Xuderías, a Asociación de Empresarios de Hostalería e Turismo da Provincia de Lugo, o Real Club Náutico de Sanxenxo, a Asociación de Municipios do Camiño de Inverno, o Celta de Vigo, Fegatur, Asnauga, Classic Surf Prol, Ruta do Viño Rías Baixas e Turexpo-Festur, ademais da empresa ElPulpo e os xeodestinos Ferrolterra, Barbanza-Arousa, Ancares-Terras de Burón, Manzaneda Trevinca, Ría de Vigo Rías Baixas, O Ribeiro-Carballiño, O Salnés, A Mariña Lucense, As Mariñas, Ría de Muros e Noia, Celanova Baixa Limia, Costa da Morte, Terras de Santiago, e Condado Paradanta.