O Real Decreto, que entrou en vigor onte, triplica a información que as persoas físicas ou xurídicas que exercen actividades de hospedaxe e alugueiro de vehículos deben enviar aos corpos e forzas de seguridade.

Esixe aos prestadores destes servizos garantir a veracidade e exactitude dos datos con multas de ata 30.000 euros en caso de non levar adecuadamente os rexistros documentais.

Algúns aspectos da norma xeran dúbidas xurídicas para o sector, xa que contravirían algunhas normativas estatais e europeas.

O Clúster Turismo de Galicia mantivo onte unha reunión con diferentes asociacións da actividade de aloxamento que mostraron o seu rexeitamento e profundo desacordo co Real Decreto 933/2021, do 26 de outubro, que entrou en vigor onte e que establece as obrigacións de rexistro documental e información das persoas físicas ou xurídicas que exercen actividades de hospedaxe e alugueiro de vehículos de motor. Unha norma que triplica os datos que deben solicitar aos clientes, que obriga a levar un rexistro informático e que esixe aos prestadores do servizo garantir a veracidade dos datos, ademais de solicitar determinada información que pode contravir outras normas estatais e europeas.

Ante esta situación o Clúster Turismo de Galicia reclama ao Estado unha revisión en profundidade do Decreto, unha prórroga para a súa entrada en vigor, ademais de máis información e mesmo unha campaña divulgativa que facilite a implantación progresiva destas novas dinámicas que requiren unha importante sobrecarga do labor administrativo. Ademais, desde o sector temen que estas medidas xeren rexeitamento e problemas cos clientes e prexuízo económico para as empresas.

Coa normativa vixente ata o de agora os aloxamentos solicitaban nove tipos de datos: rexistro, o número de documento de identidade, tipo de documento, data expedición, nome, apelidos, sexo, a data de nacemento, país de nacionalidade e data de entrada. Desde onte, coa entrada en vigor do novo Real Decreto esta cifra increméntase ata 31: nome, primeiro apelido, segundo apelido, sexo, número de documento de identidade, número de soporte do documento, tipo de documento (DNI, pasaporte, TIE), nacionalidade, data de nacemento, lugar de residencia habitual, dirección completa, localidade, país, teléfono fixo, móbil, correo electrónico, número de viaxeiros, relación de parentesco entre os viaxeiros (no caso de que algún sexa menor de idade), data e hora de entrada, data e hora de saída.

Ademais, esíxense datos financeiros como tipo de pago (efectivo, tarxeta de crédito, plataforma de pago, transferencia…), tipo de tarxeta e número, IBAN conta bancaria, solución de pago por móbil, titular do medio de pago, data de caducidade da tarxeta e data do pago, algo que podería ser contrario á normativa europea nesta materia.

Estes datos do rexistro informático terán que conservarse durante tres anos, podendo chegar as sancións por incumprimento aos 30.000 euros, imputando aos establecementos a responsabilidade da exactitude dos datos que se fagan constar.

Ademais, a pesar das novas obrigacións de rexistro que establece o Real Decreto, aínda está pendente a definición técnica e a regulación de como se remitirá esta información os Corpos e Forzas de Seguridade do Estado.

Facebook

Twitter

Linkedin