Clúster

• A comunidade conta con 2 Festas de Interese Turístico Internacional e 7 Festas de Galicia de Interese Turístico.

A Semana Santa en Galicia volve consolidarse coma un dos grandes momentos do calendario cultural e relixioso da comunidade. Con dúas celebracións distinguidas como Festas de Interese Turístico Internacional: a Semana Santa de Viveiro e a de Ferrol; e sete recoñecidas como Festas de Galicia de Interese Turístico (Fisterra, Cangas, Paradela-Meis, Betanzos, Mondoñedo, Santiago de Compostela e Lugo), o territorio ofrece un abanico de propostas onde a devoción, o patrimonio e a hospitalidade danse a man.

En Viveiro, as rúas transfórmanse en escenario de solemnidade, con procesións protagonizadas por pasos de gran valor artístico, algúns articulados, e confrarías que reforzan o ambiente íntimo da celebración. O Xoves e Venres Santo marcan os momentos culminantes, con actos multitudinarios como o Prendimiento, o Santo Encontro ou o Santo Enterro.

Pola súa banda, Ferrol acolle unha intensa programación que se estende desde o Domingo de Ramos ata o de Resurrección, con procesións organizadas por cinco confrarías que manteñen viva unha tradición centenaria. O Santo Encontro, o Santo Enterro e a procesión dos Caladiños, na noite do Venres Santo, son algunhas das máis emblemáticas.

Máis alá destas dúas grandes celebracións, Galicia ofrece outras sete citas destacadas. En Fisterra, as Festas do Santísimo Cristo reúnen a milleiros de persoas con escenificacións populares que culminan na emotiva “Danza de Nosa Señora das Areas”. En Cangas, o realismo das imaxes articuladas e a participación dos máis novos fan das procesións unha expresión viva da Paixón. Paradela (Meis) sorprende pola calidade escénica e o compromiso veciñal en cada representación, desde o Domingo de Ramos ata o de Resurrección.

Tamén Betanzos celebra a súa Semana Santa cun destacado Ciclo de Música Sacra e actos que combinan liturxia e tradición. En Mondoñedo, o carácter sobrio e recolleito das súas celebracións reflicte o peso de séculos de historia. Santiago de Compostela achega o marco monumental e espiritual idóneo para unhas procesións que avanzan entre a pedra e a néboa. E Lugo, coa súa procesión do Xoves Santo, única en España pola saída do Santísimo Sacramento, achega un signo distintivo á súa Semana Santa.

Turismo de Galicia publicou toda a programación para estas datas, que convida a visitantes e residentes a vivir unha Semana Santa que vai máis alá do relixioso. A proposta inclúe o goce do patrimonio, a natureza, a gastronomía e unha ampla rede de aloxamentos para quen desexa combinar descanso e tradición. Galicia volve ser un destino imprescindible para quen busca emocións auténticas, espiritualidade e cultura nunha contorna acolledora.