Clúster

• A comunidade galega súmase a este produto de ecoturismo compartido con Asturias, Cantabria e Euskadi para consolidar o norte como referente en sostibilidade.

Galicia dá un paso máis na súa aposta polo ecoturismo ao integrarse na nova Reserva Ecoturista da España Verde, un produto turístico que conecta a catro comunidades do norte peninsular cun obxectivo común: promover un modelo turístico baseado na sostibilidade, o respecto pola contorna e a identidade local.

A reserva inclúe máis de 30 experiencias temáticas desenvolvidas en seis espazos naturais galegos de costa e interior, e conta coa implicación directa de máis dun cento de empresas turísticas da comunidade. Estas actividades abarcan desde rutas interpretativas, observación de fauna ou fotografía de natureza, ata talleres de etnografía, artesanía e xeoturismo.

Este proxecto enmárcase dentro do Corredor de Ecoturismo da España Verde, financiado con fondos Next Generation da UE, e busca consolidarse como o maior produto de ecoturismo de España. En total, participan 25 espazos protexidos, moitos deles recoñecidos pola UNESCO como Reservas da Biosfera.

No caso galego, a oferta articúlase ao redor de seis enclaves singulares:

• Mariñas Coruñesas e Terras do Mandeo
• Ribeira Sacra e Serras do Oribio e Courel
• Os Ancares Lucenses e Montes de Cervantes, Navia e Becerreá
• Río Eo, Oscos e Terras de Burón
• Xeoparque Mundial Montañas do Courel
• Parque Nacional Marítimo-Terrestre das Illas Atlánticas

A participación galega foi coordinada desde Turismo de Galicia en colaboración coa Asociación de Ecoturismo de España, e permitiu non só deseñar experiencias sostibles, senón tamén impulsar a certificación ambiental de empresas, accións de formación e sensibilización e o desenvolvemento de estratexias de promoción dixital.

A presentación oficial da Reserva Ecoturista terá lugar o próximo 28 de maio en Madrid, nun acto que se poderá seguir en streaming a través das canles de Turespaña.