Feiras

A entidade presidida por Cesáreo Pardal aposta pola sustentabilidade para atraer a un turismo de alto valor engadido.

Unha edición máis, o Clúster xestiona un espazo de traballo para profesionais no marco de FITUR, que contou este ano coa visita de Reyes Maroto, ministra de Industria, Comercio e Turismo.

“Galicia, camiño da sustentabilidade”. Baixo este título, o presidente do Cluster Turismo de Galicia, Cesáreo Pardal, fixo balance en FITUR do último curso turístico e analizou os principais retos aos que se enfronta o sector nos próximos anos. No regreso da prestixiosa feira internacional ao seu lugar habitual no calendario, o Clúster protagonizou unha das presentacións que se desenvolveron no espazo de Galicia ao longo da xornada inaugural.

Pardal felicitou a todo o ecosistema turístico galego polos 3,5 millóns de turistas e 8 millóns de noites pasadas rexistrados ao longo de 2021 nos aloxamentos galegos, cifras que “superaron con fartura as mellores previsións que manexabamos no sector”. Así mesmo, destacou o compromiso das empresas coas medidas sanitarias e coas diferentes restricións que foi preciso aplicar, “priorizando sempre a saúde das persoas”.

Durante a súa intervención, na cal o presidente pasou revista aos principais fitos afrontados en 2021, lembrou que a insistencia na colaboración público–privada segue sendo unha dos sinais de identidade do Clúster e destacou ter traballado “de xeito conxunto coa Administración para articular mecanismos de apoio ao sector, non só para manter o tecido empresarial e o emprego nos peores momentos, senón tamén para competir con garantías chegada a tan ansiada reactivación”. Neste sentido, valorou moi positivamente o esforzo realizado pola Administración á hora de mobilizar fondos que garantisen a supervivencia das pemes e autónomos que viven do turismo.

En clave futura, Pardal puxo o foco na posta en marcha do club de produto sostible que está a desenvolver o Clúster, xa que o “destino debe ser coherente coa demanda social dun turismo sostible, que compaxine a creación de valor e o desenvolvemento económico do sector cun uso responsable dos recursos que permita preservar o medio ambiente e a calidade de vida das persoas que viven en Galicia”. Esta iniciativa busca xerar un turismo de alto valor engadido baseado na innovación, a calidade e a sustentabilidade, “o que permitirá atraer a Galicia a persoas cun maior poder adquisitivo, con capacidade de desestacionalización e con predisposición a estancias máis longas no noso territorio”.

Alberto Núñez Feijóo destacou a calidade “inigualable” de Galicia

O presidente da Xunta de Galicia, Alberto Núñez Feijóo, liderou na xornada inaugural a expedición galega en FITUR, onde afirmou que Galicia está enfocada neste 2022 a ser un destino internacional de referencia. Feijóo destacou que “camiñar a Galicia é facelo cara a un destino de calidade inigualable, marcado por escenarios excepcionais, pola cultura, a gastronomía e a hospitalidade”. Pola súa banda, o vicepresidente primeiro e conselleiro de Presidencia, Xustiza e Turismo, Alfonso Rueda, agradeceu o esforzo realizado polo sector en momentos tan difíciles e vaticinou un 2022 “excepcional, se a pandemia o permite”.

Espazo de reunións

Unha edición máis, o Clúster Turismo de Galicia mantén unha presenza moi activa en FITUR a través da xestión do espazo de traballo co que conta o sector galego para manter os seus encontros profesionais dentro do stand de Galicia. No devandito espazo, que contou este ano coa visita da ministra de Industria, Comercio e Turismo, Reyes Maroto, os profesionais do sector contan cunha área xestionada polo Clúster na que poden establecer contactos comerciais entre o mércores e o venres.