Feiras

• O CTG dispón de pases dixitais para acceder a BioCultura 2025, a solicitude pode tramitarse a través do formulario correspondente.

Do 7 ao 9 de marzo, ExpoCoruña será o escenario dunha nova edición de BioCultura A Coruña, o evento de referencia en consumo ecolóxico e turismo sostible. Neste marco, o Clúster Turismo de Galicia participará activamente cun espazo expositivo no que dará a coñecer as súas iniciativas para promover un modelo de turismo máis responsable e aliñado coa sostibilidade.

Un dos piares da súa presenza será a promoción da marca ‘Galicia Destino Sostible’ e o seu club de produto, unha iniciativa que busca consolidar Galicia como un destino de calidade, diferenciado e respectuoso coa súa contorna. A través desta proposta, o Clúster fomenta experiencias que destacan pola súa autenticidade, o seu impacto positivo na comunidade local e o seu compromiso coa conservación do patrimonio natural e cultural.

Ademais, BioCultura A Coruña 2025 reunirá a empresas e profesionais do sector ecolóxico nun espazo de divulgación e intercambio. A feira ofrecerá un programa de actividades centrado na gastronomía ecolóxica, o turismo responsable e as estratexias para minimizar o impacto ambiental, con relatorios e expositores que reflicten a crecente demanda dun modelo turístico máis sostible.

Para quen desexe asistir, o Clúster Turismo de Galicia dispón de pases dixitais para acceder a BioCultura 2025. Os interesados poden solicitalos completando o formulario correspondente e así coñecer de primeira man as iniciativas que están a transformar o ecoturismo en Galicia.

Formulario deshabilitado. Atenderanse todas as solicitudes recibidas antes do venres, 7 de marzo, ás 13:00 horas.