Feiras

• Unha decena de empresas asociadas ao CTG participarán na bolsa de contratación de Intur Negocios o 16 de novembro.
• A feira celébrase en Valladolid do 16 ao 19 de novembro.

Valladolid acolle esta semana a que será a 26 edición de Intur, a Feira Internacional de Turismo Interior, unha cita de referencia para o turismo de interior da Península Ibérica e pioneira na aposta pola promoción e divulgación deste segmento de actividade.

Intur arrincará o vindeiro xoves, 16 de novembro, coa xornada para profesionais do sector: Intur Negocios, un escenario de traballo no que participan todos os segmentos que dan forma ao turismo de interior: axencias de viaxes, operadores turísticos, aloxamento, destinos, experiencias, MICE, enogastronomía, turismo de saúde e transporte, entre outros.

A xornada profesional articula os seus contidos en torno a tres espazos: un mercado de contratación, unha área de exposición, e un foro de análise (Intur Talks) no que se tratarán aspectos como o impacto do patrimonio no turismo de interior, as chaves da promoción no exterior, ou a importancia da gastronomía como palanca para os destinos.

Preto de 70 turoperadores nacionais e internacionais participarán en Intur B2B. O perfil destes compradores engloba tanto mercados consolidados e de proximidade, como destinos afastados en crecemento. A cita contará con representantes de Bélxica, Chile, China, Estados Unidos, Indonesia, Países Baixos, Portugal, Reino Unido e Taiwán. Unha decena de empresas asociadas ao Clúster Turismo de Galicia tomarán parte na bolsa de contratación de Intur Negocios: Iberik Hoteles, Alda Hotels, Naviaventours Viaxes, Eurostars, Tee Travel, Naturmaz Viajes, Mares do Grove, Naviera Nabia, Sailway, Experiencias del Destino, Hotel Carlos I Silgar, Hotel Alfonso IX, Complejo Natural Cemar e Easy Galicia.

Do venres 17 ao domingo 19 de novembro celebrarase o apartado da feira aberto ao público xeral. Intur Viajeros engloba as propostas de máis dun milleiro de destinos, empresas e colectivos profesionais. Ademais, organizado por Escapada Rural, en Intur Viajeros comezará a procura da Capital do Turismo Rural, un título que este 2023 ostenta Campo Lameiro.