[:gl]Novas[:es]Noticias[:en]News[:]

• A cita terá lugar do 22 ao 24 de febreiro en Palexco.
• O presidente do Clúster participará como moderador nunha mesa de debate sobre a mobilidade e accesibilidade no MICE.

A Coruña quenta motores para acoller o 36º Congreso de OPC España, organizado por OPC Galicia. Máis de 250 profesionais do sector MICE daranse cita esta semana, entre o 22 e o 24 de febreiro, en Palexco. O encontro contará con relatorios centrados en diversos temas de actualidade relacionados co sector, como a sustentabilidade dos eventos, a adaptación do sector MICE a tecnoloxías como a intelixencia artificial, a fiscalidade ou a xestión de patrocinios.

O programa do Congreso elaborouse tendo en conta o Compromiso 360º, centrándose na necesidade de que as empresas do sector MICE ofrezan aos seus clientes servizos e experiencias completas, útiles e actualizadas tecnoloxicamente, pero tamén conscientes e sostibles.

O avance do programa pódese consultar a través da páxina web do congreso. O evento comezará este xoves, 22 de febreiro, a partir das 12:30 horas, coa reunión do Foro MICE, e inaugurarase pola tarde dese mesmo día, ás 16:00 horas. Así dará comezo un congreso con diversos relatorios e actividades, entre os que se atopa a mesa de debate sobre a importancia da mobilidade e accesibilidade no MICE, moderada polo presidente do Clúster Turismo de Galicia, Cesáreo Pardal. O congreso rematará o sábado, 24 de febreiro, cunha visita guiada polas rúas da cidade herculina.

O 36 Congreso Nacional de OPC España permitirá aos asistentes actualizar o seu coñecemento con relatores de máximo nivel e compartir ideas, inquietudes e descubrimentos. Esta cita anual é un dos principais encontros de networking entre as OPCs máis activas e innovadoras de España, que aproveitarán a súa asistencia para profundar sobre ámbitos como: provedores, destinos, prescritores e clientes.