Formacion

O programa, que se desenvolverá en 14 localidades galegas, componse de preto de 300 horas de formación de alto valor engadido orientada a profesionais do sector turístico galego

A primeira das xornadas arrinca o vindeiro martes en Ribeira, un seminario de Análise e Dirección Estratéxica de Empresas do Sector Turístico

O Clúster de Turismo de Galicia (CTG) presentou esta mañá na Cidade da Cultura de Santiago a terceira edición do seu Plan de Formación, que desenvolverá durante os meses de setembro, outubro e novembro co apoio de IFFE Business School no marco do convenio de colaboración subscrito coa Axencia de Turismo de Galicia. O programa componse dun total de 34 accións que se desenvolverán ao longo destes meses en 14 localidades galegas do catro provincias, co obxectivo de ofrecer unha formación de alto valor engadido e de carácter gratuíto, especialmente dirixida a mellorar as capacidades e habilidades de directivos, emprendedores e profesionais do sector turístico galego. Comeza así a terceira edición deste plan de formación, unha iniciativa que constitúe, en palabras do secretario do Clúster Turismo de Galicia, Cesáreo Pardal, “unha forte aposta do Clúster Turismo de Galicia pola formación e a profesionalización no noso sector, ao que queremos dotar de ferramentas que o fagan máis forte e competitivo”.

Neste sentido, Cesáreo Pardal destacou a importancia da formación para impulsar un sector turístico de futuro, orientado a “incrementar a competitividade e a internacionalización dos nosos produtos” e destacou que a formación ofrecida no marco deste plan de formación volve ser, unha vez máis, de caracter gratuíto e distribuída no catro provincias galegas, co obxectivo de facilitar ao máximo o aproveitamento destas formacións aos empresarios. Seminarios de internacionalización, de análise da estratexia empresarial, de habilidades de comunicación así como unha relación de talleres técnicos e un Programa Superior de Dirección e Xestión de Empresas Turísticas completarán a formación ofrecida neste programa e da que poderán beneficiar algo máis de 400 profesionais do sector.

Formación a cargo de destacados profesionais

O director xeral de IFFE Business School, Manuel Carneiro, tamén tomou parte na presentación do plan para explicar tanto as accións de formación incluídas como o panel de relatores, que conta con coñecidos expertos e profesionais en exercicio nalgunhas das principais empresas do sector, así como con reputados consultores e docentes da talla de Juan Carlos Alcaide, Jimmy Pons, Diego Fernández Pérez de Poña, Tomás Rodicio, Jorge Vallina, Xosé Luís Reza, Patricia Cuevas, Santiago Martínez, Iñaki Gaztelumendi ou Merce Carballo, entre outros, o que permitirá aos participantes nas accións formativas mellorar as súas habilidades para a comunicación, efectuar unha análise dos seus modelos de negocio, familiarizarse coas ferramentas de e-mercadotecnia ou as técnicas de revenue, cuestións todas elas útiles para potenciar as capacidades do sector turístico.

Calendario de actividades en toda Galicia

O plan de formación inclúe 19 xornadas intensivas de traballo nas localidades da Coruña, Santiago, Ferrol, Ribeira, Monforte, Ourense, Verín, Pontevedra, Vigo e Sanxenxo, articuladas en 5 Seminarios de Análises e Dirección Estratéxica de Empresas Turísticas, 4 Talleres de Habilidades de Comunicación, 4 Talleres orientados á Internacionalización, 6 Talleres Técnicos sobre sustentabilidade, revenue, e-mercadotecnia, novas tecnoloxías, experiencia de cliente e innovación aplicados ao turismo, así como un Programa Superior de Dirección e Xestión de Empresas Turísticas que se desenvolverá ao longo de máis de tres semanas en Santiago. Estas xornadas completaranse con doce accións de sensibilización sobre o uso e impacto das novas tecnoloxías no sector turístico, que alcanzarán outras tantas localidades galegas.

O prazo de inscrición para todas estas actividades xa está aberto a través da web www.iffe.es/turismo, onde tamén pode consultarse todas as actividades que van realizarse. Tras a presentación de hoxe, a primeira delas arrinca este próximo martes en Riberia cun Seminario de Análise e Dirección Estratéxica de Empresas do Sector Turístico, que se repetirá os días 25 de setembro e 3, 4 e 11 de outubro en Lugo, Pontevedra, Ourense e Santiago de Compostela respectivamente.