Xornadas

A Asociación de Directivos de Comunicación en Galicia, Dircom Galicia, foi a responsable da definición dunha sesión de traballo que congregou a expertos en comunicación, mercadotecnia, publicidade e xornalistas das principais empresas en Galicia e medios como Estrela Galicia, Gas Natural Fenosa, O Corte Inglés, Frinsa, Coca-Cola a CRTVG, ABC Galicia ou La Voz de Galicia. A xornada, Que é para ti Galicia?, organizada en conxunto co Cluster Turismo de Galicia contou tamén coa colaboración de Markea e Creatividade Galega.

O Real Club Náutico de Sanxenxo foi o lugar escollido para esta xornada de traballo que se enmarca no proceso participativo que o Clúster Turismo de Galicia está coliderando con Turismo de Galicia, para a elaboración da Estratexia de Turismo de Galicia 2017-2020.

Coñecer a visión de expertos na definición dos valores que diferencian Galicia e sitúana como destino turístico e expor como traballar para crear marca Galicia, foron dúas dos principais obxectivos perseguidos nesta xornada que permitirá contribuír á folla de ruta que trazará as liñas de traballo a seguir no sector turístico galego no catro próximos anos.

Entre as principais conclusións extraídas, que se formalizarán nun documento elaborado por Dircom para que o Cluster Turismo de Galicia incorpore ao Plan Estratéxico de Turismo de Galicia 2020, os expertos puxeron de manifesto a necesidade de definir un único posicionamento, e ese é o da calidade. Galicia debe ser única e apostar polos seus aspectos diferenciadores, debe ser multiproducto pero cunha única marca.

Valentía, emocións, dixitalización e profesionalización son algúns dos pasos necesarios para crear marca e apostar polo desenvolvemento de Galicia. Un territorio cunha variada e ampla oferta, pero que debe unirse para ser forte e comunicar cara a un mesmo obxectivo que permita crear unha verdadeira marca país.

A involucración do sector privado quedou onte patente, que xunto co apoio da administración, fará posible o construír unha verdadeira marca Galicia. A necesidade de contar cun ente xestor de marca é o primeiro paso para desenvolver unha estratexia de comercialización e dar respostas a un sector vertebrador, o máis social en Galicia. Xorde a necesidade, e é o mellor momento, de formalizar unha aposta política clara polo desenvolvemento do turismo en Galicia, xa que é algo que nos beneficia a todos.

Estas e outras conclusións incorporaranse ao documento final que se entregará a final de ano á Xunta de Galicia. A sesión foi organizada a través de dúas mesas redondas globais, “Definindo o briefing: Que é Galicia? Valores e posicionamento” e “Crear marca país. Estratexia para a competitividade do sector turístico”, e catro workshops temáticos para traballar na definición de marca país, a estratexia de destino e a campaña creativa.

O Cluster Turismo de Galicia, representante de toda a cadea de valor do turismo galego, desde o seu inicio liderou a colaboración público-privada do sector, e continuará coa execución desta folla de ruta, para a elaboración da súa estratexia, a través dun proceso participativo e aberto que está a implicar tamén, por primeira vez, ao tres Universidades galegas e a expertos nas diferentes materias para que acheguen a súa experiencia e coñecementos a este proceso.