Cluster

• Unha ducia de empresas galegas participaron este luns nun workshop para presentar as múltiples posibilidades que ofrece a Comunidade para o turismo de congresos e incentivo.
• Este encontro enmárcase no fam trip organizado por Turismo Porto e Norte de Portugal coa colaboración do Clúster.

Unha ducia de empresas galegas participaron este luns, 15 de abril, nun workshop en Vigo para dar a coñecer a oferta MICE de Galicia a un grupo de operadores canadenses. Este encontro é unha das actividades do  fam trip, organizado por Turismo Porto e Norte de Portugal coa colaboración do Clúster Turismo Galicia, para promocionar a zona da Eurorrexión como destino MICE en Canadá.

O workshop pon punto e final á visita á Galicia dos oito operadores canadenses, que comezou o pasado venres en Santa Cruz (Oleiros) e continuou pola Coruña e Santiago para rematar hoxe en Vigo. Durante estas xornadas, os integrantes do fam trip tiveron a oportunidade de coñecer parte da oferta hoteleira de cinco estrelas, así como a gastronomía da  zona e centros de congresos como Palexco e o Auditorio Mar de Vigo .

Previamente, o grupo de operadores canadenses percorreron Porto, Vilanova de Gaia e Matosinhos durante tres días nos que visitaron lugares emblemáticos como o Palacio da Bolsa, o Palacio do Freixo e o Val do Douro así como diferentes hoteis de luxo e centros de congresos como o da Alfándega ou o WOW.

Turismo MICE

Este fam trip enmárcase na estreita colaboración que veñen mantendo o Clúster de Turismo de Galicia e Turismo Porto e Norte de Portugal, co apoio da Xunta de Galicia e da Axencia Turismo de Galicia, para a promoción de ambos destinos de xeito conxunto de cara a aproveitar sinerxias e dinamizar os fluxos turísticos na Eurorrexión.

O MICE é un dos segmentos turísticos que máis contribúe a paliar a estacionalidade da actividade turística nos destinos, xera valor e crecemento e mantén a calidade e estabilidade no emprego. Segundo as cifras do INE o turista internacional de congresos tivo en 2023 un gasto medio de 298 euros por día, fronte aos 184 euros do turista de lecer.

O turismo de reunións, incentivos, congresos e exposicións contribúe a fomentar un turismo de alto valor engadido, fundamental para diversificar a oferta turística máis aló dos destinos habituais.