Xornadas

O presidente do Clúster participou nun foro sobre o sector celebrado na Facultade de Ciencias Empresarias e Turismo de Ourense.

A directora de Turismo de Galicia explicou na inauguración da sesión que no primeiros oito meses deste ano o turismo rural aumentou o número de viaxeiros nun 49 % e as noites pasadas nun 29 %.

A situación do turismo rural e os seus retos e perspectivas de futuro centraron o foro celebrado o mércores 16 na Facultade de Ciencias Empresariais e Turismo do Campus de Ourense da Universidade de Vigo e no que o presidente do Clúster Turismo de Galicia tivo un papel destacado. Cesáreo Pardal foi un dos encargados de intervir no acto inaugural xunto coa directora da Axencia Turismo de Galicia, Nava Castro; a decana de Ciencias Empresariais e Turismo, Mª Montserrat Cruz; a xerente do Inorde, Emma González; e o coordinador do foro e do Máster Universitario en Dirección e Planificación do Turismo Interior e de Saúde, Jose Antonio Fraiz Brea.

Ademais, unha vez que o codirector do Observatorio do Turismo Rural en España, Enric López, presentou os datos que o organismo xuntou deste sector en Galicia, Cesáreo Pardal, participou nunha mesa redonda co propio López, o investigador do Departamento de Economía Aplicada da Universidade de Santiago de Compostela Fidel Martínez, e o presidente da Federación Galega de Turismo Rural (Fegatur), Francisco Almuíña.

O presidente do Clúster aproveitou a súa participación neste Foro de Turismo Rural para reivindicar a importancia do turismo rural galego como referente de sustentabilidade e calidade. Cesáreo Pardal lembrou que “dos 31 aloxamentos rurais que teñen o distintivo Q de Calidade Turística en España, o 61 % están na nosa comunidade” e destacou tamén como esta opción turística desempeñou durante a pandemia e segue a desempeñar agora un importante papel como alternativa para os que buscan gozar de espazos naturais e lugares non masificados e do valor engadido que lles ofrece o turismo rural.

Tamén se referiu aos retos e as estratexias que debe afrontar o sector para consolidar a súa tendencia á alza: a aposta pola sustentabilidade e a conservación da contorna e o patrimonio, a procura de fórmulas que permitan superar a estacionalidade e atraer clientes fóra da tempada alta, o avance na dixitalización das canles de venda e promoción dos seus produtos, a internacionalización a través de alianzas con outros actores para atraer clientes doutros países, e a especialización dos aloxamentos con experiencias únicas que lles permitan diferenciarse. Respecto diso, apuntou que estes aspectos xa aparecen recollidos no Plan Director 2021-23 elaborado desde o Clúster en colaboración coa Administración galega e en iniciativas como o Club de Produto Galicia Destino Sostible, que comezou a súa andaina este verán.

Pola súa banda, a directora da Axencia Turismo de Galicia fixo fincapé nos bos resultados que colleitou o turismo rural galego no primeiros oito meses desta ano ao alcanzar os 147.000 viaxeiros aloxados e sumar 287.000 noites pasadas, o que supón un incremento do 49 % e o 29 %, respectivamente, con respecto ás cifras do 2021. Nava Castro destacou tamén o gran potencial deste sector para estimular o crecemento da economía local, ao complementarse con outras actividades, e a súa capacidade para promover que a actividade turística se estenda por todo o territorio e máis aló dos períodos de maior demanda.