Axencia Turismo de Galicia

Representantes do sector MICE galego como Palexco ou ExpoCoruña xunto con Turismo da Coruña e Turismo de Galicia estarán presentes nesta cita do 16 ao 18 de maio

O turismo de feiras, congresos e incentivos, MICE, ten unha cita obrigada do 16 ao 18 de maio en Alemaña, na feira IMEX de Frankfurt, unha das citas profesionais máis importantes no ámbito do turismo de reunións. Representantes deste sector como ExpoCoruña ou Palexco xunto con Turismo da Coruña viaxarán da man de Turismo de Galicia a este espazo de promoción co obxectivo de dar a coñecer Galicia como destino ideal para o turismo de feiras, congresos, incentivos, presentacións de produto, etc…

Durante a celebración do certame desenvolveranse diferentes encontros cos principais operadores turísticos europeos relacionados co turismo de reunións ademais de desenvolver unha axenda de encontros profesionais no espazo expositivo de Turismo de Galicia, na caseta E300, no que se ofrecerá información sobre a oferta galega vinculada cos congresos como con outros recursos paisaxísticos, gastronómicos ou de infraestrutura hoteleira.

A feira IMEX de Frankfurt consolidouse como unha cita imprescindible para o sector MICE, cunha edición que superou os 3500 expositores de 150 países e coa visita de máis de 9000 profesionais vinculados ao sector.