- El mejor turismo de galicia
Feiras
- A feira celebrarase do 1 ao 3 de marzo no recinto de EXPOCoruña.
- A marca Galicia Destino Sostible contará cun stand propio, promocionando a oferta turística sostible da rexión.
A V edición de BioCultura xa está aquí, e celebrarase do 1 ao 3 de marzo. EXPOCoruña repetirá outra edición con tres días de actividades e exposición de produtos e experiencias ecolóxicas, demostrando que outras formas de consumo son posibles para garantir un futuro sostible.
A feira contará con ata 150 expositores e un cento de charlas e actividades complementarias. Alimentos ecolóxicos, cosmética econatural, téxtil sostible e moito ecoturismo terán cabida no evento. Tanto é así, que o ecoturismo será un dos grandes protagonistas da cita: “Poñemos moita atención ao fenómeno do ecoturismo, que non para de medrar. Cada vez hai máis persoas que queren viaxar para coñecer de verdade o destino e gozar en formatos que non destorcen a natureza, senón que teñen un impacto positivo nela”, declara a directora da feira, Ángeles Parra.
A oferta turística de diferentes lugares de Galicia estará representada a través de institucións como a Reserva de Biosfera Mariñas Coruñesas e Terras do Mandeo, a Reserva Os Ancares Lucenses, o Club Enoturismo de España, o Clúster Turismo de Galicia, as Deputacións da Coruña, Lugo e Ourense, e o Consello Regulador da Agricultura Ecolóxica de Galicia (CRAEGA). Ademais disto, tamén participará un gran número de compañías ecolóxicas galegas e do resto de España. Entre as galegas atópanse empresas como Bubela Artesá, Orballo, Porto Muiños, Daiquí SGC, Abella Meiga, Traloagro, Tradeza Natur, Muuhlloa ou Casa Grande de Xanceda.
O Clúster Turismo de Galicia participará no evento a través dun stand da marca Galicia Destino Sostible, a través da cal se promocionará o traballo que se está a facer en materia de sostibilidade, e co que se promoverá a oferta turística sostible da rexión. Ademais disto, o presidente do Clúster, Cesáreo Pardal, asistirá á inauguración do evento, que terá lugar o venres, 1 de marzo, a partir das 11:00 horas.
