Axudas

• O prazo de solicitudes permanece aberto ata o 19 de xuño de 2024 a través da sede electrónica da Xunta.

O Diario Oficial de Galicia publicou o pasado venres, 19 de xaneiro, a convocatoria das subvencións a proxectos turísticos para o fomento do turismo enogastronómico, no marco do Plan de recuperación, transformación e resiliencia, financiado pola Unión Europea-NextGenerationEU. As axudas desagréganse en tres liñas de acción:

A primeira, cun orzamento de 2.610.000 euros, impulsa a adecuación e embelecemento de establecementos turísticos (hoteleiros ou de restauración) para a posta en valor de servizos de enoturismo (servizos específicos de adega, actividades dirixidas ao coñecemento e divulgación de todo o relacionado co viño, elaboración, degustación…). Estes establecementos turísticos deberán estar vinculados a unha adega e/ou a parte dos seus viñedos.

A segunda liña, con 590.000 euros de presuposto, sufraga proxectos dixitais promovidos por establecementos turísticos de aloxamento e restauración que poñan en valor de produtos vitivinícolas e gastronómicos e favorezan a visita. Tamén inclúe o desenvolvemento tecnolóxico aplicado ao marketing turístico, a personalización, o desenvolvemento de contidos audiovisuais de calidade e o uso de ferramentas interactivas.

A terceira liña, cun orzamento de 2.300.000 euros, sufraga a ampliación e mellora da capacidade de aloxamento que impliquen a dotación de novas prazas de aloxamentos, respecto das inscritas no REAT, e que estean vinculados á posta en marcha de experiencias enogastronómicas, tales como visitas en orixe que poñan en valor o proceso de creación da materia prima, o seu coidado, recolección, procesado, elaboración do produto final, así como experiencias interactivas de cociña ou showcooking, degustacións e catas.

O prazo de presentación de solicitudes é de cinco meses, rematando o 19 de xuño de 2024 ás 23:59 horas. Lembra que para tramitala debes acceder a través da sede electrónica da Xunta de Galicia, código de procedemento TU503I.