Axudas

• O seu obxectivo é promover o desenvolvemento tecnolóxico e a transformación dixital das empresas turísticas para mellorar a súa competitividade, adaptándose ás novas necesidades e tendencias do sector turístico.
• A subvención conta cun orzamento de 1,5 M€.

O Diario Oficial de Galicia publicou o pasado mércores, 5 de xullo, as bases reguladoras para a concesión das subvencións da Axencia Turismo de Galicia para a promoción da dixitalización no sector turístico. As axudas, de concorrencia non competitiva, contan cun orzamento de 1,5 M€.

O obxectivo desta liña de axudas é contribuír á competitividade das empresas de aloxamento turístico, de restauración e das axencias de viaxe, promovendo o seu desenvolvemento tecnolóxico e o proceso de transformación dixital no sector, para potenciar Galicia como destino turístico.

Considéranse gastos subvencionables aqueles en que incorrese a persoa solicitante entre o 1 de xaneiro e o 15 de novembro. As axudas subvencionarán gastos derivados da transformación dixital, entre os que se atopa a instalación de novos PMS (Property Management System) e ERP (Enterprise Resource Planning), a integración de PMS e ERP actuais, a instalación de novos CRM (Customer Relationship Management), instalación dun cannel manager, instalación de ferramentas de visualización, consulta e análise de datos, implementación de motores de reserva, incorporación de sistemas e metodoloxías para reforzar a seguridade dos datos, utilización de tecnoloxías disruptivas (blockchain, realidade virtual ou aumentada, big data e análises-explotación de datos, sensorización e comunicación entre máquinas, intelixencia artificial).

Ademais disto, tamén subvenciona os gastos de equipamento tecnolóxico e gastos de aloxamento ou servizos na nube necesarios para os procesos indicados anteriormente, e gastos derivamos da creación do produto e/ou comercialización da oferta turística.

O importe da subvención será do 80% do investimento subvencionable, de 15.000 € por persoa beneficiaria. Polo tanto, a axuda máxima a percibir será de 12.000 €.

Son beneficiarios destas axudas os establecementos hoteleiros, campamentos de turismo, establecementos de turismo rural, apartamentos turísticos, vivendas turísticas, albergues turísticos, empresas de restauración (restaurantes, cafetarías e bares) e axencias de viaxes.

O prazo de solicitudes é dun mes contado a partir do día seguinte ao da publicación da resolución no Diario Oficial de Galicia. Polo tanto, o luns 7 de agosto, ás 23:59 horas, será o derradeiro día do prazo.

Podes acceder á convocatoria a través da sede electrónica oficial da Xunta de Galicia, co código de procedemento TU503C.