Cluster

A xornada, na que participarán destacados expertos, foi organizada coa colaboración da Deputación de Pontevedra e a Axencia Turismo de Galicia.

O prazo para anotarse e asistir as mesas redondas e relatorios previstos estará aberto ata as 18 horas deste luns.

O Auditorio Municipal de Vilagarcía de Arousa acollerá este martes, 20 de decembro, unha xornada monográfica sobre Boas prácticas na xestión turística organizada polo Clúster Turismo de Galicia coa colaboración da Deputación de Pontevedra e a Axencia Turismo de Galicia e que reunirá a un nutrido grupo de expertos tanto do sector público como do privado. O obxectivo desta actividade, que se estruturará ao redor de varias presentacións e mesas redondas, é permitir que estes axentes turísticos compartan as súas experiencias e dean a coñecer exemplos de boas prácticas na xestión turística en diversos ámbitos, así como a valoración dos beneficios a medio e longo prazo que a implantación de sistemas de xestión adecuados ten tanto para as empresas como para os destinos.

As actividades darán comezo ás 9.30 horas coa intervención do alcalde de Vilagarcía de Arousa, Alberto Varela Paz; o presidente do Clúster, Cesáreo Pardal, e a presidenta da Deputación de Pontevedra, Carmela Silva, e concluirán ás 14 horas co acto de peche a cargo do vicepresidente do Clúster, Jesús Picallo; a deputada provincial de Novas Tecnoloxías e Desenvolvemento Empresarial, Ana María Mejías, e a directora de Turismo de Galicia, Nava Castro.

Entremedias desenvolveranse dúas mesas redondas e dous relatorios. A primeira mesa, prevista para as 10 horas, estará dedicada ás boas prácticas en destino e contará coa participación de Emilio Torres, de Vía Verde do Aceite, e Paulo Queiroz, de JPQ Consultores (Portugal), e con Ana Laura Iglesias, deputada provincial de Turismo e Xuventude, como moderadora. A continuación (11 horas), Fiorella Petrone e Jaime de la Calzada, de Amadeus, falarán da análise e a previsión de turismo a través do Big Data.

Víctor Sixto, experto en turismo e enogastronomía, será o protagonista do seguinte relatorio (12.15) falando das experiencias turísticas. E xa ás 12.45 horas, a última mesa redonda, dedicada ás boas prácticas empresariais, reunirá a María Troncoso, de Hostalería polo clima, Coca-Cola EuroPacific Partners; Rafael González, socio director de Vivential Value, Roberto Fraga, CEO de Pilgrim, e, como moderadora, á deputada provincial Ana María Mejías.

A inscrición na xornada é gratuíta e o prazo para anotarse estará aberto ata as 18 horas deste luns, día 19, a través da seguinte ligazón: https://clusterturismogalicia.com/gl/eventos/jornada-buenas-practicas-en-gestion-turistica/