Recursos

• O investimento canalizarase a través de dúas convocatorias diferentes, a primeira das cales xa saíu no DOG.

A Xunta de Galicia aprobou un investimento de 7,8 millóns de euros para mellorar a oferta de aloxamento turístico termal na comunidade, mediante a creación e rehabilitación de hoteis balneario e hoteis talaso. A medida forma parte do Plan territorial de vilas termais e centros históricos, financiado parcialmente con fondos NextGeneration da UE a través do Mecanismo de Recuperación e Resiliencia, e aplicarase entre 2025 e 2026.

Este investimento canalízase a través de dúas convocatorias:

• 1,7 millóns de euros estarán destinados a novas construcións ou reformas que permitan poñer en marcha aloxamentos turísticos termais, sempre que conten con augas certificadas como mineromedicinais ou mariñas. Esta convocatoria xa foi publicada no DOG o pasado venres, 9 de maio, e os gastos subvencionais divídense en dúas liñas:
  • Liña 1: construción, reforma ou rehabilitación sostible de edificios e adaptación de infraestruturas ou instalacións para a posta en marcha dun novo establecemento turístico de aloxamento vinculado a un balneario ou talaso.
  • Liña 2: sistemas de enerxías renovables e economía circular no novo establecemento turístico vinculado a un balneario ou talaso.

• 6,085 millóns de euros dedicaranse á rehabilitación e modernización de hoteis balneario e talaso xa existentes, con especial atención á sostibilidade, a implantación de enerxías renovables e a economía circular. Para optar a estas axudas, será necesario crear polo menos cinco empregos directos e promover actividades que reforcen o turismo sostible e o tecido local.

Ademais, a Xunta de Galicia xa anunciou unha terceira liña de actuación, enfocada na difusión da cultura termal galega a través de xornadas, publicacións e outras iniciativas de sensibilización.