O proxecto internacional Ecotours é unha iniciativa cofinanciada pola Comisión Europea no marco do Programa para o Mercado Único (Pilar PMU/PEME). Este proxecto prevé a prestación de servizos directos e de apoio financeiro ás MIPEME propostas polos membros do consorcio para promover a adopción de prácticas de desenvolvemento sostible e converter zonas que se enfrontan a retos socioeconómicos en novos destinos turísticos circulares, verdes e sostibles.
O proxecto diríxese ás microempresas das comunidades locais de Sicilia, en Italia; Macedonia occidental, en Grecia; Córsega, en Francia; Nicosia, en Chipre; o Condado de Csongrád-Csanád, en Hungría, e Galicia, en España, centrándose no patrimonio natural e cultural de importancia internacional. Ecotours pretende mellorar a capacitación das microempresas turísticas e os ecosistemas do turismo comunitario para promover o turismo circular e adoptar principios, prácticas e normas medioambientais nos seus negocios.
O consorcio do proxecto está formado por 7 organizacións de 6 países da Unión Europea, sendo a Universidade de Vigo a única representante española. Co obxectivo de revitalizar o turismo circular, desde Ecotours lanzan unha convocatoria dirixida ás MIPEMES que desexen mellorar os servizos relacionados co ecoturismo e co-desenvolver novos itinerarios de turismo circular e sostible participando en 5 actividades: consultoría e coaching para o desenvolvemento de negocios circulares; consultoría e certificación no ámbito da sustentabilidade; participación nunha visita de estudo transnacional; apoio á creación dun itinerario de ecoturismo circular; e o deseño dunha proposta para o concurso final de innovación.
As empresas interesadas poderán formalizar a súa solicitude a través deste formulario (en inglés) ata o xoves, 10 de agosto, ás 17:00 horas. O programa agrupará ata 96 MIPEMES de ámbitos relacionados co turismo, 16 por cada país socio representado no consorcio. Cada beneficiario seleccionado recibiría un apoio financeiro, con carácter indicativo, de 6.650,00 euros. Para a resolución de dúbidas sobre a convocatoria pódese contactar coa UVIGO nos seguintes enderezos: loli.docampo@uvigo.es e pilar.munoz@uvigo.es, ou visitar a web oficial do proxecto.