Turismo Sostenible

• O obxectivo é dar apoio aos asociados no tocante á comunicación das empresas para poñer en valor os seus esforzos para ser cada vez máis sostibles, chegando ás persoas concienciadas que buscan realizar un turismo responsable.
• A formación, gratuíta, vai dirixida a tódalas empresas adheridas ao Club Galicia Destino Sostible.
• As inscricións están abertas ata o 14 de novembro.

A iniciativa Galicia Destino Sostible ofrece unha formación en comunicación da sostibilidade a todas aquelas empresas que forman parte do Club. A través desta, os asociados terán a oportunidade de coñecer as claves para achegar aos turistas o desempeño ambiental da empresa. Esta formación potencia as habilidades de comunicación e o foco sostible para mellorar o grao de satisfacción e a relación das empresas cos turistas que visitan Galicia. Falarase sobre a importancia das accións ambientais, sociais e de bo goberno de cara a vertebrar unha oferta turística diferenciada pola súa conexión co desenvolvemento sostible.

A formación constará de dúas sesións. A primeira, presencial, está aberta ás empresas adheridas ao Club, previa inscrición. Terá lugar o vindeiro 16 de novembro, a partir das 10:00 horas, na sala Fontán da Cidade da Cultura, en Santiago de Compostela. A segunda sesión consistirá nunha formación en liña e persoal, de 2 horas de duración, na que se traballará sobre a realidade de cada empresa. Está dirixida a un máximo de 30 empresas e realizarase entre o 27 de novembro e o 5 de decembro.

Esta formación será impartida por Pedro Tasende, xerente da axencia de comunicación Aporta Comunicación e xornalista cunha ampla experiencia en sostibilidade e comunicación corporativa. O programa xeral incorpora cuestións como a identificación de grupos de interese, o enfoque segundo a actividade, os medios de comunicación e a sostibilidade, greenwashing, a importancia da narrativa, comunicación interna e externa, visión estratéxica, plan operativo e boas prácticas. Podes consultar toda a información aquí.

Para participar é necesario inscribirse a través desta ligazón antes do 14 de novembro. Na propia páxina poderase indicar se interesa acudir só a formación presencial, ou se tamén se quere participar na formación individualizada. Ten en conta que para participar na segunda sesión, é preciso ter asistido á primeira.

Para máis información podes contactar a través do correo info@galicidestinosostible.com ou do teléfono 881 50 51 02.