Axudas

• Os establecementos poderán solicitar as subvencións entre o 12 de setembro e o 12 de novembro de 2025

A Axencia Turismo de Galicia anunciou unha nova convocatoria coas subvencións destinadas a mellorar a integración paisaxística e ambiental de establecementos turísticos situados en concellos costeiros. O obxectivo desta axuda é apoiar actuacións que contribúan a coidar a imaxe do litoral galego, corrixir impactos paisaxísticos e impulsar un turismo máis sostible.

• A convocatoria dispón tres liñas de axudas diferentes

As achegas están dirixidas tanto a aloxamentos turísticos (hoteis, campamentos, casas e apartamentos de uso turístico, albergues ou vivendas turísticas) como a empresas de restauración (restaurantes, bares e cafetarías). A convocatoria inclúe tres grandes liñas de actuación: a mellora da eficiencia enerxética, a dixitalización de recursos turísticos e a renovación de fachadas e cubertas.

Entre os gastos subvencionables atópanse desde a mellora das instalacións de iluminación para reducir consumo eléctrico, ata a creación de ferramentas dixitais ou códigos QR que faciliten a información ao visitante. Ademais, tamén se apoiará o revestimento e pintado de fachadas, a renovación de carpintarías ou a mellora de cubertas e muros exteriores, sempre co obxectivo de reducir o impacto visual e integrar mellor os negocios na contorna.

O investimento máximo admitido varía en función da liña: ata 25.000 euros na eficiencia enerxética, 15.000 euros en dixitalización e 250.000 euros para melloras de fachada, cunha intensidade da axuda que pode cubrir ata o 80 % do custo total do proxecto.

As solicitudes deberán tramitarse a través da sede electrónica da Xunta de Galicia, baixo o código de procedemento TU503F, e poderán presentarse entre o 12 de setembro e o 12 de novembro de 2025.