turismo agroalimentario

Representantes do turismo agroalimentario provincial, axentes turísticos, produtores, guías, expertos en comunicación, hostaleiros… déronse cita nas primeiras Xornadas de Turismo Agroalimentario que celebrou a Deputación de Lugo co obxectivo de impulsar este tipo de turismo na provincia. A iniciativa enmárcase dentro do Plan Estratéxico de Turismo da provincia, e contou coa participción de responsables de proxectos de éxito relacionados con este sector como o Instituto Galego do Viño, Milhulloa, Champivil, Caurelor, Embutidos Suarna ou do CRDO Queixo do Cebreiro, ademais de empresas turísticas como I´m a Local e de Ponlle cara ao turismo, que abordou as novas oportunidades turísticas como alternativa ao desenvolvemento rural.

Tal e como explicou o presidente da Deputación de Lugo, Darío Campos, a entidade busca contribuír a “pór en valor os proxectos relacionados co sector agroalimentario que, con tanto éxito está a realizarse actualmente na provincia, e ao mesmo tempo pomos en valor a nosa materia prima de primeira calidade”.

Desta maneira a Deputación dá os primeiros pasos para tratar de desenvolver unha oferta de turismo alternativo, centrado nos produtos e ligado á paisaxe da provincia, a partir dos produtos de calidade que ofrece o sector primario e das experiencias exitosas de emprendedores que apostaron decididamente por este sector. A xornada completouse cunha visita á ‘Ruta da Faba de Lourenzá’.