As dúas partes asinarán un convenio que permitirá destinar 1,5 millóns de euros durante os próximos 3 anos á realización de campañas, a participación en feiras e congresos, e a creación de produtos turísticos.

A Xunta volve depositar a súa confianza no Clúster Turismo de Galicia como entidade crave para o desenvolvemento do sector na comunidade. Así se materializará no convenio de colaboración entre as dúas partes que foi autorizado na reunión do Consello da Xunta celebrada o venres 10 de decembro. O acordo prevé que a Xunta realice unha achega de 1,5 millóns de euros, que se repartirán en tres anualidades de 500.000 euros para os exercicios 2022, 2023 e 2024.

Ese diñeiro permitirá o Clúster traballar para alcanzar os obxectivos do Plan Director 2021-2023 Galicia Destino Seguro que elaboraron a Xunta, o propio Clúster e as tres universidades galegas e cuxos piares clave son a seguridade, a sustentabilidade e a calidade. O convenio permitirá á entidade que preside Cesáreo Pardal promocionar e comercializar Galicia como destino turístico seguro, tanto no mercado nacional como no internacional, recuperar a confianza dos viaxeiros e fomentar a elección desta terra por parte do novo consumidor xurdido por mor da pandemia da covid.

Entre as accións previstas figuran a posta en marcha de campañas publicitarias, a participación en feiras, congresos, exposicións e outros eventos similares, e a creación e consolidación de produtos turísticos. Tamén se promoverán viaxes de familiarización e workshops, e apoiaranse proxectos de márketing en liña que axuden a sacar proveito das novas tecnoloxías na difusión da oferta turística galega. Ademais, o Camiño de Santiago xogará un papel importante nestas accións como elemento diferenciador e eixo vertebrador e estratéxico da marca Galicia.

Facebook

Twitter

Linkedin