Expertos nacionais e internacionais que se deron cita no a xornada “Obxectivo 5 millóns” promovida polo Clúster de Turismo de Galicia destacaron que Galicia o ten todo para consolidar o seu crecemento turístico

A procura da autenticidade e das experiencias únicas e novas xunto cos profundos cambios que a tecnoloxía introduciu tanto na xestión de destinos turísticos como nas viaxes de incentivos e negocios centraron boa parte do II Encontro Clúster Turismo de Galicia, que se celebrou no Auditorio Mar de Vigo no que se deron cita unha ampla representación do sector turístico galego para coñecer e mellorar a captación de novos fluxos de visitantes a Galicia, que axunta todo o que os novos viaxeiros demandan dun destino, segundo destacaron os relatores.

Do mesmo xeito tamén se destacou a necesidade de traballar conxuntamente, sector e administracións unidos, na promoción e consolidación do destino Galicia aproveitando a tendencia positiva actual de crecemento. A #Xornada5M ocupou a súa primeira parte coas intervencións dos expertos Mady Keup e Raúl García, que abordaron a necesidade de implementar as novas tecnoloxías para mellorar as experiencias do viaxeiro, que o sector debe esforzarse por coñecer mellor para poder ofrecer unha experiencia personalizada e auténtica. “Os pequenos destinos deben perfilar un discurso alternativo, a súa propia historia e deben empregar as novas canles para dala a coñecer”, explicou Mady Keup, que destacou a necesidade de que o sector asimile que a economía colaborativa chegou para quedar e que deberá escoitarse ao sector para lograr o encaixe de ambos os modelos.

O responsable de Aprendedeturismo.org, Raúl García, pola súa banda abordou os cambios substanciais que vive o sector MICE, coa crecente profesionalización na organización das viaxes de incentivos e a aparición de grandes OPCs que asumen a xestión das reunións asociativas. García ofreceu unha serie de consellos para mellorar o proceso de organización deste tipo de turismo, incrementar a captación de novos segmentos de mercado e mellorar a satisfacción dos seus clientes, que buscan elementos creativos, destinos novos e reunións máis informais nas que se lles ofrezan experiencias diferenciais.

Novos segmentos de mercado e internacionalización da oferta
Os mercados británicos, alemán e estadounidense centraron a primeira das mesas redondas da xornada, que contaron coa participación dos responsables das Oficinas de Turismo de España en Londres, Frankfurt e Chicago. Ignacio do Val, subdirector da OET de Londres, destacou as grandes potencialidades de Galicia como destino emerxente para o mercado inglés, que busca fundamentalmente descanso, natureza e turismo mariñeiro. “Todo o que busca o segmento de turista inglés de clase alta ofréceo Galicia, que ademais conta cunha boa conectividad e boa relación calidade/prezo”, destacou.

Este segmento de mercado tamén é o que capta Galicia no mercado alemán, que segue sendo maioritariamente de sol e praia. Con todo, desde a OET de Frankfurt, Xullo López destacou o interese de Turismo de España en incrementar o fluxo doutro tipo de turista alemán, de maior poder adquisitivo, que é o interesado na oferta turística do norte peninsular. ?É necesario potenciar o coñecemento do Destino Galicia, destacando natureza, cultura e saúde, que son elementos que van buscando os segmentos de mercado que queremos captar?, explicou López. Finalmente Carola Sara, directora da OET de Chicago destacou tamén as grandes potencialidades do destino Galicia como opción alternativa ás rutas habituais que xa coñece o turista de EE.UU, xa que o noso territorio ofrece todo o que eles están a buscar, aínda que falta seguir traballando en situar a Galicia no imaxinario deste turista, que fundamentalmente ten de Galicia a referencia do Camiño de Santiago.

Novas ferramentas tecnolóxicas
Baixo o título “Obxectivo 5 millóns: Retos e oportunidades da comercialización e tecnoloxía do Destino Galicia”, a xornada finaliza esta tarde coa participación do director de Desenvolvemento de Negocios e Novas Tecnoloxías de Segittur, Enrique Lancis e cunha mesa redonda na que se abordará de forma práctica a aplicación das novas tecnoloxías para a mellora da comercialización turística coa participación de representantes de empresas punteiras como Beonprice, a empresa española de referencia do revenue management, o channel manager ParityRate ou do Instituto Tecnolóxico Hostaleiro, completando unha mesa imprescindible para entender como se modificou en moi poucos anos o funcionamento da comercialización da oferta turística na que o uso do big data e a consolidación do uso do channel manager, que permite reunir a información de centos de axentes que cambian as súas ofertas de hospedaxe on e off line minuto a minuto, é fundamental.

Así tamén o destacaban na inauguración tanto a directora de Turismo de Galicia, Nava Castro, que incidiu no incremento da cifra de viaxeiros e nas potencialidades de Galicia como a presidenta da Deputación, Carmela Silva, e o alcade de Vigo, Abel Caballero que xunto co presidente do Clúster Turismo de Galicia, Francisco González, e o presidente de Segittur, Antonio López de Ávila, foron os encargados de inaugurar esta xornada, na que se deron cita máis de 350 profesionais do sector turístico galego.

Facebook

Twitter

Linkedin