Esta medida supón o peche de todo salvo as farmacias, as tendas de alimentación, os estancos e os quioscos de prensa.

Restauración, balnearios e albergues do Camiño de Santiago deixaron xa de prestar os seus servizos ao público desde a medianoite do pasado venres en cumprimento de RESOLUCIÓN do 13 de marzo de 2020 na que se recolle o acordo do Consello da Xunta polo que se declara a situación de Emerxencia Sanitaria en todo o territorio galego e actívase o plan territorial de Emerxencias de Galicia (Platerga) no seu nivel IG (emerxencia de interese galego), como consecuencia da evolución da epidemia do coronavirus COVID-19 co fin de evitar a expansión do coronavirus.

No que se refire á suspensión de actividades a resolución indica a suspensión da actividade durante 14 días naturais, contados desde a publicación deste acordo no Diario Oficial de Galicia, de todos os establecementos de espectáculos públicos e actividades recreativas incluídos no anexo do Decreto 124/2019, do 5 de setembro, polo que se aproba o Catálogo de espectáculos públicos e actividades recreativas e establecementos abertos ao público da Comunidade Autónoma de Galicia e establécense determinadas disposicións xerais de aplicación na materia e, nomeadamente:

• Cinemas
• Teatros
• Auditorios
• Circos
• Establecementos de espectáculos deportivos
• Recintos feirais
• Casinos
• Salas de bingo
• Salóns de xogo
• Tendas de apostas
• Estadios deportivos
• Pavillóns deportivos
• Recintos deportivos
• Pistas de patinaxe
• Ximnasios
• Piscinas de competición
• Piscinas recreativas de uso colectivo
• Parques acuáticos
• Salóns recreativos
• Parques multiocio
• Museos
• Bibliotecas
• Salas de conferencias
• Salas polivalentes
• Salas de concertos
• Restaurantes
• Salóns de banquetes
• Cafetarías
• Bares
• Establecementos para actividades zoolóxicas, botánicas e xeolóxicas
• Salas de festas
• Discotecas
• Pubs
• Cafés-espectáculo
• Furanchos
• Centros de lecer infantil

Os establecementos de restauración, como cafetarías, bares e restaurantes, permanecerán pechados ao público e poderán prestar exclusivamente servizos de entrega a domicilio ou para a súa recollida no local e consumo a domicilio. A permanencia nestes establecementos deberá ser a estritamente necesaria. En todo caso, evitaranse aglomeracións e controlarase que consumidores e empregados manteñan a distancia de seguridade establecida co fin de evitar posibles contaxios.

O peche non afecta os bares e restaurantes localizados en establecementos hoteleiros ou no interior das instalacións destinadas á prestación de servizos públicos, sempre que a súa actividade limítese estritamente aos seus clientes aloxados ou aos traballadores das instalacións.

Así mesmo, disponse por igual tempo a suspensión da actividade dos establecementos balnearios regulados na Lei 5/1995, do 7 de xuño, de regulación das augas minerais, termais, de manancial e dos establecementos balnearios da Comunidade Autónoma de Galicia, así como a dos espazos termais e piscinas termais de uso lúdico, reguladas na Lei 8/2019, do 23 de decembro, de regulación do aproveitamento lúdico das augas termais de Galicia.

Suspéndese polo tempo previsto neste acordo a actividade dos albergues de peregrinos da rede pública da Xunta de Galicia.

Facebook

Twitter

Linkedin