• A feira internacional do termalismo celebrarase en Paipa do 24 ao 26 de setembro

Galicia volverá posicionarse como referente do turismo termal internacional coa súa participación en Termatalia Colombia 2025, que terá lugar na cidade de Paipa (Boyacá) entre o 24 e o 26 de setembro. O Clúster Turismo de Galicia e Expourense representarán ao sector galego neste encontro global que reunirá a profesionais, destinos e empresas internacionais.

No marco da feira, o presidente do Clúster Turismo de Galicia, Cesáreo Pardal, intervirá no VI Congreso Internacional sobre Auga e Saúde, onde abordará a importancia da cooperación público-privada como elemento clave para transformar e reforzar a competitividade do turismo galego dentro da sección “Lexislación, normativas termais e calidade”.

• Termatalia contará cunha axenda académica de referencia mundial

Ademais da feira expositiva e as roldas de negocio, Termatalia Colombia incluirá unha ampla axenda académica con expertos de máis de doce países, que tratarán temas como a sustentabilidade, o turismo de saúde, a cosmética termal ou a innovación tecnolóxica no sector. Galicia, cunha recoñecida tradición termal e balnearia, aproveitará esta cita para reforzar o seu posicionamento internacional.

A representación galega en Paipa terá tamén un compoñente cultural. A Real Banda de Gaitas de Ourense viaxará por primeira vez a Colombia para actuar no marco da feira, dentro do programa de irmandamento entre Galicia e o país latinoamericano. Un fito que servirá para proxectar o patrimonio musical galego e estreitar vínculos entre ambos os territorios.

Termatalia 2025 será unha oportunidade única para compartir experiencias, abrir novas oportunidades de negocio e consolidar a cooperación internacional en torno ao termalismo.

Facebook

Twitter

Linkedin