Turismo Sostenible

• A sesión abordou como integrar a accesibilidade universal e cognitiva nas empresas turísticas

Un grupo de 61 empresas participou na primeira das dúas sesións da formación en liña “Accesibilidade Universal para un Turismo Sostible”, organizada polo Club de Produto “Galicia Destino Sostible”, co apoio do Clúster e da Axencia Turismo de Galicia. A iniciativa, que continuará o 21 de outubro, ten como obxectivo capacitar aos profesionais do sector turístico galego na creación de contornas e servizos máis accesibles e inclusivos.

Durante as dúas horas de sesión, as persoas participantes puideron afondar na relación entre accesibilidade e sostibilidade, coñecendo boas prácticas e ferramentas prácticas para mellorar a atención e comunicación con persoas con discapacidade intelectual ou do desenvolvemento, así como con familias e outros colectivos con necesidades especiais.

• Formación especializada en accesibilidade cognitiva

A actividade está impartida polo equipo de ErrazTEA, servizo especializado en accesibilidade cognitiva e inclusión de persoas con discapacidade intelectual e do espectro autista. A través de exemplos prácticos e dinámicas participativas, explícanse conceptos como a lectura fácil, o uso de pictogramas ou o deseño de espazos e servizos máis comprensibles para tódalas persoas.

A formación contribúe a que as empresas galegas poidan diferenciarse pola súa aposta pola inclusión, mellorando a experiencia da clientela e reforzando o seu compromiso coa sostibilidade e cos Obxectivos de Desenvolvemento Sostible (ODS). A segunda sesión celebrarase o 21 de outubro, completando así as catro horas totais de duración desta proposta formativa.